БЕРІК ОТБАСЫ – БАҚЫТТЫ ҚОҒАМНЫҢ БАСТАУЫ

          Отбасы – әрбір адамның өміріндегі ең қастерлі ұғым. Ол – мейірім мен махаббаттың, сыйластық пен жауапкершіліктің, ұлттық тәрбие мен рухани құндылықтардың алтын бесігі. Тату отбасы – қоғамның тұрақтылығы мен мемлекеттің дамуының берік негізі.

         Қазақ халқы ежелден отбасы құндылығын жоғары бағалаған. «Отан – отбасынан басталады» деген дана сөздің мәні бүгінгі күні де өзектілігін жоғалтқан жоқ. Әрбір бала алғаш рет өмірдің мәнін, адамгершілік пен ізгілікті, еңбекке құрметті өз отбасында үйренеді. Сондықтан ата-ананың өнегесі – ұрпақ тәрбиесінің ең маңызды мектебі.

        Қазіргі қоғамда отбасы институтын нығайту ерекше маңызға ие. Ерлі-зайыптылардың өзара түсіністігі, бір-біріне деген құрметі мен сенімі – шаңырақтың беріктігінің кепілі. Ал балалардың алаңсыз өсіп, сапалы білім мен саналы тәрбие алуы – отбасының басты міндеттерінің бірі.

        Ұлттық салт-дәстүрді дәріптеу, үлкенді құрметтеп, кішіні ізеттеуге баулу, отбасы мүшелерінің арасындағы сыйластық пен қамқорлықты сақтау – қоғамдағы бірлік пен татулықтың негізі. Осындай құндылықтарды ұстанған отбасылар ғана елдің ертеңін жарқын ете алады.

         Бүгінде мемлекет тарапынан отбасы мен ана және баланы қолдау бағытында көптеген бағдарламалар жүзеге асырылуда. Дегенмен, отбасының бақыты ең алдымен оның мүшелерінің өзара түсіністігіне, сабырлылығы мен жауапкершілігіне байланысты.

         Берік отбасы – ұлттың байлығы, елдің болашағы. Әр шаңырақта татулық пен береке орнап, ұрпақ тәрбиесіне ерекше көңіл бөлінсе, қоғамымыз да ізгілікке, бірлікке және дамуға қадам басады. Отбасылық құндылықтарды сақтау – әрқайсымыздың азаматтық парызымыз.

«Мақтаарал ауданының ішкі саясат бөлімі» мемлекеттік мекемесі.

Мырзакент кенті.