«АУЫЛ» ПАРТИЯСЫНА 25 ЖЫЛ: ЕЛ БОЛАШАҒЫ ҮШІН АДАЛ ҚЫЗМЕТ

           Астанада Қазақстанның ауылдық өңірлерін дамытуға бағытталған саяси күш – «Ауыл» партиясының құрылғанына 25 жыл толуына орай «Ауыл» партиясы: 25 жыл белесі» атты ғылыми-практикалық конференция ұйымдастырылды. Бұл маңызды шара ауыл мәселелеріне арналған кең ауқымды пікір алмасу алаңына айналып, партияның бүгінгі орны мен болашаққа жоспарларын талқылауға мүмкіндік берді.

         Конференция бағдарламасы «Ауыл — ел болашағы» атты деректі фильмнің көрсетілімімен ашылды. Фильмде партияның құрылу кезеңінен бастап бүгінгі күнге дейінгі дамуы, ауыл шаруашылығын қолдау бағытындағы бастамалары, ел өміріндегі маңызы кеңінен баяндалды. Бұл көрініс қатысушыларға «Ауыл» партиясының Қазақстанның әлеуметтік-экономикалық дамуына қосқан үлесін айқын түсінуге септігін тигізді.

       Сонымен қатар, конференция аясында «Ауыл нақыштары» атты шығармашылық байқаудың үздік туындылары көрмеге қойылды. Бұл байқау ауылдың рухани мәдениетін, ұлттық дәстүрлер мен заманауи шығармашылық элементтерін ұштастыра отырып, ауыл өмірінің сан қырын ашуға бағытталды. Көрмеге қойылған жұмыстар ауыл тұрғындарының өмірі мен тұрмысын көркем бейнелеп, олардың мүдделерін қолдауға деген партияның ықыласын көрсетті.

         Конференцияны Мәжіліс депутаты, партия төрағасы Серік Егізбаев ашып, «Ауыл» партиясының тарихы мен негізгі бағыттарына тоқталды. Ол атап өткендей, ширек ғасырлық тарихында партия өз саяси және идеологиялық ұстанымдарынан ешқашан таймай, ауылдық өңірлер мен ауыл шаруашылығы мәселелерін үнемі көтеріп келеді.

         «Біздің басты міндетіміз – халықтың сенімін ақтау. Біз ауыл тұрғындарының әлеуметтік жағдайын жақсартуға, ауыл шаруашылығын дамытуға нақты шешімдер ұсынумен айналысамыз. Партияның жұмысы еліміздің ауылдық аймақтарын өркендетуге бағытталған және бұл бағытта біз өз міндетімізді абыроймен орындап келеміз», – деді Серік Егізбаев.

         Айта кету керек, «Ауыл» партиясының Абай облысы бойынша өңірлік филиалының Төрағасы – Смағұлов Қайрат Қанатұлы да конференцияға қатысып, өңірдегі ауылды дамыту бағытындағы жұмыстың маңыздылығын атап өтті. Ол Абай облысындағы ауыл шаруашылығын қолдау және ауыл тұрғындарының өмір сапасын арттыру мәселелеріне ерекше көңіл бөлініп жатқанын жеткізді. Сонымен қатар, конференцияға «Ауыл» партиясының басқа да мүшелері белсенді қатысып, партияның мақсат-міндеттері мен ауылды дамытудағы өзекті мәселелерді талқылауға ат салысты. Бұл – партия мүшелерінің елдің әлеуметтік-экономикалық дамуына, әсіресе ауылдық жерлердің өркендеуіне деген зор жауапкершілігін көрсетеді.

        «Абай облысы – ауыл шаруашылығы мен ауыл мәдениеті үшін маңызды аймақ. Біз «Ауыл» партиясы ретінде жергілікті деңгейде де халықтың сенімін ақтап, ауылдың өркендеуіне барымызды саламыз», – деді Смағұлов Қайрат Қанатұлы.

          «Ауыл» партиясының 25 жылдық мерейтойы – бұл ауыл мен ауыл тұрғындары үшін адал қызмет пен сенімділіктің белгісі. Алдағы жылдарда да партия ауылды дамыту, оның тұрғындарының тұрмысын жақсарту бағытындағы жұмысын жалғастыра бермек.

«Ауыл» партиясы Абай облысы бойынша өңірлік филиалы.