«АБАЙ ОБЛЫСЫНЫҢ ТАРИХИ ТОПОНИМДЕРІ» ЖИНАҒЫ ЖАРЫҚ КӨРДІ

         Абай облысының мәдениет, тілдерді дамыту және архив ісі басқармасының тапсырысымен Шәкәрім университетінің «Тарих және археология» ғылыми орталығы өңір тарихының тамырлы кезеңдерін қамтитын «Абай облысының тарихи топонимдері» атты жаңа ғылыми жинақ дайындады. Танымдық әрі ғылыми құндылығы жоғары бұл еңбек – елді мекен атауларында сақталған көне шежірені жаңғыртып, ұлттық танымды тереңдете түсетін маңызды бастама.

        Жинақта, облыс аумағындағы тарихи атаулардың шығу төркіні, атаудың мағынасы, қалыптасу негіздері мен мәдени-тарихи контекстісі жүйелі түрде қамтылған. Топонимдер ғылыми дәлдік пен әдістемелік негізде сараланып, зерттеушілерге, өлкетанушыларға, тіл мамандарына және студенттерге арналған құнды материал ретінде ұсынылған.

         Тұсаукесер рәсіміне, өңірдің белгілі тарихшы-ғалымдары, жазушылары, зиялы қауым өкілдері қатысып, жаңа еңбектің маңызын атап өтті. Олар, Абай облысының топонимикасын зерттеу – тек, атауларды анықтау ғана емес, ұлт тарихының жаңа қырларын ашуға, ұмытылған деректерді жаңғыртуға мүмкіндік беретінін тілге тиек етті.

         Шараға, «Абай облысы Бородулиха ауданының Мемлекеттік және басқа тілдерді оқыту орталығының» директоры Атаева Мейрамгүл Балабайқызы да қатысып, тіл маманы ретінде жаңа жинақтың ғылыми салмақтылығына тоқталды. Ол аталмыш еңбектің тарихи-танымдық, тілдік және мәдени құндылығын айта келе, жас буынға, әсіресе гуманитарлық бағыттағы жастар қауымы үшін баға жетпес ресурс екенін айтты.

          Жинақтың жарық көруі өңірлік топонимика саласын дамытудағы маңызды қадам болып табылады. Бұл – тек ғылыми ортаға ғана емес, жалпы қоғамға ұсынылған құнды дүние. Өңірдің тарихын тереңнен тануға, жер-су атауларының астарындағы ұлттық рухты сезінуге жол ашатын еңбек екені даусыз.

 Ерік ҚАЙРАТБЕКҰЛЫ,

журналист.