ЖӘРМЕҢКЕ – ЖҰРТҚА ТИІМДІ БАСТАМА

           Құрылтай депутаттарын сайлау қарсаңында Мақтаарал ауданында тұрғындардың әлеуметтік жағдайын қолдауға бағытталған бірқатар игі іс-шара ұйымдастырылуда. Соның бірі – А. Қалыбеков ауылдық округіне қарасты Үлгілі елді мекеніндегі №392 сайлау учаскесінің алдында өткен ауыл шаруашылығы жәрмеңкесі.

         Таң сәріден жәрмеңке алаңына жиналған ауыл тұрғындары өздеріне қажетті азық-түлік өнімдерін тиімді бағамен сатып алуға мүмкіндік алды. Жергілікті шаруалар мен кәсіпкерлер өздері өндірген өнімдерін көпшілік назарына ұсынып, сауда сөрелерін ауыл шаруашылығы тауарларымен толықтырды.

       Жәрмеңкенің негізгі мақсаты – тұрғындарға сапалы ауыл шаруашылығы өнімдерін қолжетімді бағамен ұсыну, жергілікті тауар өндірушілерді қолдау және азық-түлік бағасының тұрақтылығына үлес қосу. Сауда сөрелерінен бау-бақша өнімдері, көкөністер және басқа да күнделікті тұтынуға қажетті азық-түлік тауарларының түр-түрін кездестіруге болады. Ең бастысы – өнімдер нарықтағы қалыпты бағадан шамамен 10-15 пайыз төмен бағамен сатылды. Бұл, әсіресе, күнделікті тұтынатын азық-түлік өнімдерін тиімді бағамен сатып алуға мүмкіндік алған ауыл тұрғындары үшін тиімді бастама болды.

          Жәрмеңкеге келген тұрғындар қажетті тауарларын таңдап, жергілікті шаруалар мен кәсіпкерлердің өнімдерін тікелей сатып алды. Сауда орындарында өнімнің мол қоры жасақталып, тұтынушыларға таңдау мүмкіндігі кеңінен ұсынылды.  Жәрмеңке тек тұрғындар үшін ғана емес, жергілікті ауыл шаруашылығы тауар өндірушілері үшін де тиімді алаңға айналды. Себебі шаруалар өз өнімдерін делдалсыз тікелей тұтынушыға ұсынуға мүмкіндік алды.

        Арадағы делдалдар санының азаюы өнім бағасының қолжетімді болуына оң әсер етеді. Бұл ретте тұтынушы сапалы өнімді тиімді бағамен алса, өндіруші өз еңбегінің нәтижесін тікелей халыққа ұсынады. Яғни, мұндай жәрмеңкелер екі тарапқа да тиімді.

        Жергілікті тұрғындар үшін тағы бір артықшылығы – ауыл шаруашылығы өнімдерін өз өңірінде өндіріп отырған шаруалардан тікелей сатып алу мүмкіндігі. Бұл жергілікті кәсіпкерлікті дамытуға, ауыл шаруашылығы тауар өндірушілерін қолдауға және ішкі нарықтағы өнім айналымын арттыруға мүмкіндік береді.

          Жәрмеңкенің сайлау учаскесінің алдында ұйымдастырылуы ауыл тұрғындары үшін қосымша қолайлылық туғызды. Азаматтар дауыс беру учаскесіне келіп, өздерінің азаматтық таңдауын жасаумен қатар, тұрмысқа қажетті азық-түлік өнімдерін тиімді бағамен сатып ала алды.

           Айта кетейік, Мақтаарал ауданында Қазақстан Республикасы Құрылтайы депутаттарының сайлауына байланысты 62 дауыс беру учаскесі өз жұмысын бастады. Сайлау процесімен қатар, аудан тұрғындары үшін қоғамдық және әлеуметтік маңызы бар бірқатар шаралар ұйымдастырылуда.