ЖЕТІСТІК ЖОЛЫ ЕҢБЕКТЕН БАСТАЛАДЫ

         Жетісай ауданы білім бөліміне қарасты «Ғ.Мұратбаев атындағы №61 жалпы білім беретін мектеп» коммуналдық мемлекеттік мекемесінің кәсіптік бағдар беру педагогының онкүндік жоспарына сәйкес “Жетістік жолы еңбектен басталады” тақырыбында мектеп түлектері мен оқушылар арасында мазмұнды әрі әсерлі сыр-сұхбат кездесуі ұйымдастырылды. Шараның негізгі мақсаты – оқушыларды түрлі мамандық иелерімен жүздестіру, олардың өмір жолынан үлгі алуына мүмкіндік жасау және түлектердің табысқа жету тәжірибесі арқылы жас буынды еңбекқорлыққа, мақсаттылыққа тәрбиелеу болды.

         Кездесуге өз саласында табысқа жеткен мектеп түлектері,қарапайым мамандық иелері:мектебіміздің электригі талай жылдар бойы адал еңбек еткен өз ісінің шебері: Мейрамбай Төребеков, мектепке дейінгі білім саласында ізденімпаздық пен жаңашылдықтың жолбасшысы болып жүрген, «Айшары» балабақшасының меңгерушісі Эльвира Тұрғанбаева, іскерлік пен табандылығының арқасында еңбегімен ел алғысына бөленген ауылымыздың тұрғыны,жеке  кәсіпкер Кенжебек Зайниев  қонаққа келді. Келген қонақтар өздерінің кәсіби жолдары, таңдаған мамандықтары, алғашқы қадамдары мен басынан өткен қызықты да қиын кезеңдері туралы шынайы әңгімелеп берді. Түлектер оқушыларға өмірдегі табысқа жетудің ең басты негізі – талмай еңбектену, ұмтылу, жауапкершілік және үздіксіз білім алу екенін атап өтті.

         Сыр-сұхбат барысында оқушылар белсенді сұрақтар қойып, болашақ мамандық таңдау, жоғары оқу орнына түсу, өз қабілетін дұрыс бағыттау туралы кеңестер алды. Түлектер жастарды қорықпай қателеспеуге, қиындықтардан қашпай, керісінше, оларды тәжірибе ретінде қабылдауға шақырды. Әрбір қонақ өз тәжірибесі арқылы «жетістік кездейсоқ келмейді, еңбектің нәтижесі» екенін нақты мысалдармен көрсетті.

        Шара соңында оқушылар өз алған әсерлерімен бөлісіп, түлектерге алғыстарын білдірді.

       Жалпы, “Жетістік жолы еңбектен басталады” атты сыр-сұхбат оқушыларға мотивация беріп, болашаққа деген сенімін нығайтқан тағылымды кездесу болды.Кездесу соңында, оқушылар кеш қонақтарына алғыстарын білдіріп, естелік суреттерге түсті.Мұндай кездесулер жас ұрпаққа шабыт беріп,еңбекқорлық пен мақсатқа ұмтылудың маңызын терең сезінуге жол ашады. Онкүндік аясындағы бұл іс-шара мектептегі кәсіптік бағдар жұмысының тиімділігін арттыруға елеулі үлес қосты.

А.ПИРНАЗАРОВА,

Ғ.Мұратбаев атындағы №61 ЖББМ кәсіптік бағдар беру педагогы.

Жетісай ауданы.