ҰЛТЫН СҮЙГЕН ҰЛЫ ЖҮРЕК

          Биыл елімізде қазақтың жарық жұлдызы, Алаш қозғалысының қайраткері Мағжан Жұмабаевтың 130 жылдығына орай түрлі іс-шаралар өткізілуде. Сондай іс-шараның бірі – Жетісай аудандық «Тілдерді оқыту және дамыту орталығы» коммуналдық мемлекеттік мекемесінің ұйымдастыруымен  Қазыбек би ауылдық округіне қарасты «М.Жұмабаев» атындағы жалпы орта мектебінде болып өтті.

        «Ұлтын сүйген ұлы жүрек» тақырыбында өткізілген осы іс-шараның мақсаты –  жас буынды Мағжан Жұмабаевтың өмір жолы мен шығармашылығымен таныстыру, жастар арасында қазақ поэзиясын насихаттау және оларды Отансүйгіштікке тәрбиелеу болып табылды.

        Іс-шараға аудандық «Тілдерді оқыту және дамыту орталығының» басшысы Қ.Рысмаханов, Ғани Мұратбаев атындағы Жетісай гуманитарлық-техникалық колледжі директорының орынбасары С.Аташев, Қазыбек би ауылдық округі Аналар кеңесінің төрайымы Н.Байтасова, мектеп ұжымы мен оқушылары қатысты.

       Әдеби кеш барысында Мағжан Жұмабаевтың өлеңдері оқылып, ақынның шығармашылығы мен өмірі жайында бейнебаяндар көрсетілді. Мағжан Жұмабаев жай ғана ақын емес, ұлт болашағы үшін күрескен Алаш қайраткері. Рухты жырларымен халықты жігерлендіріп, елді татулыққа шақырды.

       Ақын өзінің шығармаларындағы кейіпкерлерін, айналасындағы жастарды да «арыстандай айбатты, жолбарыстай қайратты» қалыпта көргісі келді. Халқының болашағы үшін күресетін негізгі күш — жастар екенін айтып, өз өлеңінде сол жастарға үлкен үмітпен қарады. Бірақ солақай саясаттың құрбаны боып, жалған жала жабылып, кеңестік жүйенің қуғын-сүргініне ұшырап, ату жазасына кесілді. Ұрпаққа берер тағылымы мол, мазмұнды өткен әдеби кеш қатысушылары поэзиямен сусындап, мол рухани азық алды.

       Кеш соңында іс-шараның жоғары деңгейде өтуіне атсалысқан мектеп ұстаздарына алғыс хат табысталып, өз өнерлерін көрсеткен оқушыларға күнделік дәптерлер берілді. Қазақ әдебиетінің тарихында Мағжан Жұмабаев көп қырлы талант иесі, жаңашыл ұлт ақыны, зергер жазушы, педагог ғалым, кемел ойлы әдебиетші ретінде халқының жүрегінде мәңгілік сақталмақ.

Мөлдір БАЛХАШОВА,
Жетісай ауданының мәдениет, тілдерді дамыту, дене шынықтыру және спорт бөлімінің «Тілдерді оқыту және дамыту орталығы» коммуналдық мемлекеттік мекемесінің әдіскері.