ДОМБЫРА – ҰЛТТЫҢ ҮНІ, РУХТЫҢ ТІЛІ

        Қазақ халқы үшін домбыра – әуен ғана емес, атадан балаға жеткен аманат, елдің ішкі жан дүниесін жеткізетін рухани құндылық. Қос ішектің күмбірі – ғасырлар бойы халқымыздың қуанышы мен қайғысын, асқақ арманы мен мұңын үнсіз жеткізіп келген үн.

        Осы рухани мұраны ұлықтау мақсатында Қазақстанда 2018 жылдан бастап шілденің бірінші жексенбісі – «Ұлттық домбыра күні» болып белгіленді. Бұл – ұлттық өнерді дәріптейтін, жастардың бойына рухани тәрбие сіңіретін, халықты бірлік пен елдікке бастайтын мерекеге айналды.

         Домбыра – қазақ даласының рухани шежіресі. Оның әрбір күйі – бір оқиға, әрбір сазы – бір тағдыр. Құрманғазының «Серпері», Дәулеткерейдің «Көроғлысы», Тәттімбеттің «Саржайлауы» мен Динаның «Бұлбұлы» – ұлт рухының саз тілімен жазылған айшықты беттері.

         Домбыра арқылы халық өз тарихын шертіп, күймен өмір сүріп отырды. Бұл – ешбір аудармашысыз, сөзсіз түсінуге болатын тікелей ұлттық тіл.

        Бүгінде, домбыра тек, өнер сахнасында ғана емес, білім ордаларында, мәдениет үйлерінде, отбасылық ортада қайта жаңғырып келеді. Бұл үрдісті жандандыру – ел болашағына жасалған рухани инвестиция.

              Мамандардың пікірінше, домбыра үйрену – тек музыкалық машық емес, ол – баланың дүниетанымын кеңейтетін, эстетикалық талғамын арттыратын, мінез-құлқын қалыптастыратын тәрбие құралы.

           Домбыра – ұлттық болмысты бойға сіңірудің таптырмас мұратты жолы. Қос ішек арқылы ұрпақтар ата тарихына, ана тіліне, салт-дәстүрге жақындай түседі. Сондықтан, мектептерде домбыра үйірмесін ашу, ұлттық музыка сабақтарын енгізу – бұл тәрбие мен білімнің қатар жүруіне жағдай жасауға толық негіз дер едім.

         Осы іспеттес ой – пікірді қолдайтын ата-аналар мен ұстаздар да көбейіп келеді. Әсіресе, ауыл-аймақтарда өткізілетін «Күй шеруі», «Домбыра-думан» сияқты шаралар үлкен қолдауға ие болуда екенін байқап жүргеніміз шындық.

       Домбыра күні – бір күндік мереке болмауы керек. Бұл күн ұлттық өнерді насихаттау, күй мәдениетін зерттеу, күйшілік мектептерді қолдау, шеберлер мен ұстаздарды бағалау сияқты нақты қадамдарға жол ашуы қажет.

         Мереке аясында: Домбыра шеруі, Күй байқауы, Ашық аспан астындағы концерттер,Мектептерде арнайы сабақтар өткізу –
ұлттық өнерді жас ұрпаққа жеткізудің жарқын жолы бола алады.

         Ұлттық домбыра күні – бұл қазақтың өз үніне, өз болмысына қайта қарауы. Бұл күн – ұлтты ұлықтайтын, халықты рухани тұрғыда біріктіретін, жас ұрпақты тәрбиелейтін маңызды күн.

         Домбыра – біздің кешегіміздің көзі, бүгініміздің белгісі, ертеңіміздің үміті. Оның күмбірі – елдің рухын жаңғыртар үн.

        Домбыраның үні өшпесін. Ұлттық домбыра күні құтты болсын!

«Ауыл» партиясы Абай облысы бойынша өңірлік филиал баспасөз қызметі.