СЕМЕЙДЕ АЛҒАШ РЕТ ТІКЕЛЕЙ ҚАЛА ӘКІМІНІҢ САЙЛАУЫ ӨТТІ

         2025 жылдың 12 қазанында Семей қаласында еліміз бойынша алғаш рет қала әкімі тікелей сайлау арқылы сайланды. Бұл тарихи оқиға –Қазақстандағы жергілікті өзін-өзі басқару жүйесін жетілдіру және азаматтардың саяси белсенділігін арттыру жолындағы маңызды қадам ретінде бағалануда.

        Аумақтық сайлау комиссиясының дерегіне сәйкес, Семей қаласы бойынша сайлаушылар тізіміне 220 761 азамат енгізіліп, олардың 118 553-і дауыс беруге қатысқан.

       Сайлау қорытындысы төмендегідей:

       Қожанбаев Әділет Нұрсағатұлы – 89 441 дауыс;

        Төлеуов Қаныш Мақсұтұлы – 12 557 дауыс;

       Бекжасаров Айболат Каиркешевич – 9 763 дауыс жинады.

       Сайлау нәтижесінде, көпшілік дауыспен Қожанбаев Әділет Нұрсағатұлы Семей қаласының әкімі болып таңдалды. Әділет Нұрсағатұлы бұған дейін Абай облысы Көкпекті ауданының әкімі қызметін атқарған. Мемлекеттік қызмет саласында тәжірибесі мол, өңірдің әлеуметтік және экономикалық дамуына елеулі үлес қосқан басқарушы ретінде де белгілі.

      Айта кетейік, сайлау күні «Ауыл» партиясының Абай облысы бойынша өңірлік филиалының өкілдері — Ерік Омарғалиев, Ажар Жакупова және Балжан Ерсаина сайлау учаскелерінде Байқаушылар ретінде қызмет атқарды.  Олар, дауыс беру барысының әділ, ашық және заң талаптарына сай өтуін мұқият қадағалап, сайлау тәртібінің сақталуына баса назар аударды.  Соныменде, Байқаушылар қала аудандарыныңәр жерінде орналасқан учаскелерде ғана емес, көшпелі дауыс беру кезінде, яғни үй-үйлерді аралау барысында да өз міндеттерін адал орындады.   «Біз қатысқан учаскелерде сайлау үдерісі жоғары деңгейде ұйымдастырылды. Азаматтар өз таңдауларын еркін жасады. Жалпы айтқанда, сайлау әділ және ашық өтті деп сеніммен айта аламыз», — деді байқаушылар.

        Семейдегі бұл сайлау — қоғамдық сенім мен азаматтық жауапкершіліктің айқын көрінісі болды. Қала тұрғындары демократиялық жаңғыру жолындағы бастамаларға белсенді қатысып, ел өміріндегі маңызды тарихи сәттің куәсі атанды.

«Ауыл» партиясы Абай облысы бойынша өңірлік филиалының баспасөз қызметі.