АБАЙ ОБЛЫСЫНДА “МЕЙІРІМ ҚҰШАҒЫ” ЖОБАСЫ АЯСЫНДА ӘЛЕУМЕТТІК САЛА ҚЫЗМЕТКЕРЛЕРІ КҮНІНЕ ОРАЙ “АНАЛАР КЕҢЕСІ” ӨКІЛДЕРІ “АҚ ҰЛПА АНАЛАР” ҰЙЫМЫ БАСШЫСЫМЕН КЕЗДЕСТІ

           Абай облысында Әлеуметтік қорғау жүйесі қызметкерлері күніне арналған мерекелік шара “Мейірім құшағы” жобасы аясында өткізілді.   Іс-шараны «Абай облысының жұмыспен қамту және әлеуметтік бағдарламаларды үйлестіру басқармасы» мен “Ақ ұлпа аналар” Қоғамдық Біірлестігі бірлесіп ұйымдастырды.  Шара мақсаты – әлеуметтік сала мамандарының еңбегін бағалау, қоғамдағы адамгершілік пен мейірімділік сынды құндылықтарды кеңінен дәріптеу және ізгі істерді насихаттау.

       Мерекелік жиын барысында, облыс әкімінің орынбасары Раханов Мейірлан Ақылбекұлы әлеуметтік салада абыроймен еңбек етіп жүрген бірқатар мамандарға Алғыс хаттар мен 200 000 теңгенің сертификаттарын табыс етті. Бұл марапаттар – халыққа қалтқысыз қызмет етіп жүрген әлеуметтік сала қызметкерлерінің еңбегіне деген шынайы құрмет пен ілтипаттың белгісі.

        Шара барысында, «Әміре Қашаубаев атындағы мемлекеттік филармонияның» әншілері мен мүмкіндігі шектеулі жандар концерттік бағдарлама ұсынып, көрермендерді тамаша көңіл — күйге бөледі. Әсем әуен сазы тербетіп үйлескен мейірім мен жан жылулығы кештің шырайын келтіріп, рухани серпіліс сыйлады.

           Мерекелік жиын аясында “Аналар кеңесінің” кездесуі өтіп, оған “Ақ ұлпа аналар” Қоғамдық Бірлестігінің жетекшісі Сүлейменова Анар Әбетайқызы қатысып, шараның мән-маңызына тоқталып, әлеуметтік сала мамандарын кәсіби мерекелерімен құттықтады.

        – “Мейірім құшағы” жобасы – қоғамдағы аналық жылулық пен мейірімділіктің нышаны. Әлеуметтік сала қызметкерлері – мейірім мен қамқорлықтың дәнін себетін ізгі жандар. Бүгінгі шара – олардың еңбегіне деген құрметтің жарқын көрінісі, – деді Анар Әбетайқызы.

         Кездесу барысында, аналар кеңесінің мүшелері әлеуметтік сала өкілдеріне ізгі тілектерін білдіріп, қоғамдағы бірлік пен рухани құндылықтардың маңызын атап өтті.

           Айта кету керек, “Мейірім құшағы” – «Ауыл» партиясының бастамасымен жүзеге асып келе жатқан әлеуметтік бағыттағы маңызды жоба. Жоба аясында түрлі қайырымдылық шаралары, мәдени және қоғамдық кездесулер ұйымдастырылып, халықтың әлеуметтік белсенділігін арттыруға, қоғамдағы мейірім мен қамқорлық құндылықтарын насихаттауға бағытталған жұмыстар атқарылып келеді.

        Осындай “Мейірім құшағы” жобасы аясында өткен бұл шара – әлеуметтік сала қызметкерлерінің еңбегіне деген құрмет пен қоғамдағы ізгілік рухын дәріптеген маңызды мәдени оқиға болды. Олардың еңбегі – қоғамның рухани тұрақтылығы мен әлеуметтік бірлігінің негізі.

       Мереке соңында, шараға қатысушылар өзара естелік фотосуретке түсіп, мейірім мен жылылыққа толы әсерлі сәтті ерекше қабылдап, мәңгі есте қалдырды.

«Ауыл» партиясы Абай облысы бойынша өңірлік филиалының баспасөз қызметі.