ӨНЕРДІ СҮЙГЕН ІЗГІ ЖАН

         (Мәдениет саласына адал қызмет етіп келе жатқан Мұрат Әбеуов турасында)

          Абай облысы, Семей қаласының тұрғыны Мұрат Санақұлы Әбеуов – Мәдениет саласына өмірін арнаған, өз ісінің нағыз майталманы. Бүгінде ол Семей қаласындағы «Мәдениет сарайында» Дыбыс операторы қызметін 20 жылдан астам уақыт бойы атқарып келеді. Осы жылдар ішінде талай үлкен сахналық шаралардың жоғары деңгейде өтуіне еңбек сіңірген Мұрат Санақұлының өзіндік қолтаңбасы бар.

        Мұрат Санақұлы – қазақ мәдениетіне еңбегі сіңген біртуар тұлға, елге белгілі өнер иесі Санақ Әбеуовтің ұлы. Санақ Әбеуов өз заманында ел мәдениетінің өркендеуіне зор үлес қосқан, халық өнерін дәріптеген, дәстүр мен руханияттың шырағын жаққан абзал азамат болған. Әкенің жолын жалғап, өнер мен мәдениет әлемінде өз орнын тапқан Мұрат та осы өнер әлемінің жарқыраған темірқазық — жұлдызы. Ол техника мен өнердің тоғысқан тұсында еңбек етіп, сахнадағы дыбыс қызметін атқарып жүрген тәжірибелі маман.

           Көпшілік көрермен үшін сахнадағы әуезді әуен, көркем көрініс пен айқын дыбыс — бір сәттік әсер ғана… Ал, сол әсердің қалқанында тынымсыз еңбек пен кәсіби шеберлік жатыр. Мұрат Әбеуов осы еңбектің көрінбейтін, бірақ, аса маңызды тұстарын үйлестіріп отырған білікті азамат. Ол әрбір концерттің, мерекелік шараның, театр қойылымының сапалы өтуі үшін техникалық тұрғыдан үлкен жауапкершілік арқалайды. Дыбыстың тазалығы мен үйлесімділігі — көрермен көңілінің алтын кілті екенін жақсы түсінеді.

          Мұрат Санақұлы өз ісін жай ғана жұмыс деп есептеген емес, өмірлік миссиясы деп біледі. Оның айтуынша, табыстың басты сыры – сүйіспеншілік пен адалдық. «Қай сала қызметкері болсаңыз да, өз мамандығыңызды сүйіспеншілікпен және жігермен атқару керек. Сонда ғана еңбегіңіздің шынайы нәтижесін көресіз», – дейді ол. Осы қарапайым, бірақ мәні терең ұстаным оның бүкіл еңбек жолына бағыт беріп келеді.

         Өнерпаз Мұрат Әбеуов сынды азаматтар – ұлттық мәдениеттің іргетасын ұстап тұрған мақтаныш тұлғалар. Олар көзге түспей қалқада еңбектенсе де, ел руханиятының дамуына өлшеусіз өзіндік үлесін тигізуде. Оның әрбір жасаған ісі, әрбір мәдени шарадағы еңбегі – қазақ өнерінің сапасын арттыруға бағытталған елеулі қызмет.

         «Еңбек адамы» тұрғысында даңқ үшін емес, ел игілігі үшін өз еңбегін сарп етіп жүрген еңбекқор жан. Ол – әке дәстүрін жалғастырып, ұлт мәдениетінің өрісін кеңейткен, өз мамандығына адалдықтың айнасына айналған бірегей дүр — тұлға. Оның өмір жолы, өнері жас ұрпаққа өнеге, еңбекқорлық пен кәсіби шеберліктің үлгісі болып қала бермек.

«Ауыл» партиясы Абай облысы бойынша өңірлік филиалының баспасөз қызметі.