ЦЕХТА 120 АДАМ ЖҰМЫС ІСТЕУДЕ

          Алматы облысы,  Ұзынағаш ауылында Алатау тігін цехы 2022 жылдың қараша айынан жұмыс істеп келеді.

         Қазіргі таңда бұл цехта 120 адам жүмыс істеуде. Оның ішінде халықты жұмыспен қамту бағдарламасы бойынша тігіншілік курсын оқыған он шақты адам бар.

         «Біз негізінде мемлекеттік сатып алулар сайтындағы конкурстарға қатысамыз. Бүгінде Қорғаныс министрлігінің тапсырмасын орындап жатырмыз. Әзірше, жеке адамдардан тапсырыс алып жатқан жоқпыз. Цех толықтай жеке кәсіпкердің қаржысына тұрғызылған. Ендігі жылы аяқ киім шығаратын өндіріс ошағын ашып, 300-400 адамды жұмыспен қамтуды ниет етіп отырмыз», – деді цех директорының орынбасары Анар Егізбаева. Сонымен қатар серіктестік өкілі мамандар тапшылығы бар екенін айтты.

            «Әр цехтың жанынан оқыту курсын ашқан жөн. Себебі, маман тапшылығы бар. Ал қызметшілердің әлеуметтік жағдайына келсек, барлығы ресми, заңды түрде жұмысқа орналасқан», – деді директор орынбасары.

          Ауданда жалпы құны 90 млрд. 400 млн. теңгені  құрайтын 4 инвестициялық  жобаны 2027 жылға дейін жүзеге асыру арқылы 3 800  жаңа жұмыс орындарын құру жоспарланған, осылайша өңірдегі  жұмысыздық деңгейін төмендету көзделіп отыр.

           Аида ҚОЖМАМБЕТОВА,

 Алматы облысы.