ОТБАСЫ – АДАМ ӨМІРІНІҢ АЛТЫН ДІҢГЕГІ

       Отбасы – әр адамның өміріндегі ең қымбат әрі қасиетті ұғымдардың бірі. Адамның тұлға болып қалыптасуы, өмірге деген көзқарасының орнығуы, мейірімділік пен жауапкершілікті бойына сіңіруі ең алдымен отбасындағы тәрбиеден басталады. Сондықтан отбасы – қоғамның берік негізі, мемлекеттің тұрақтылығы мен болашағының маңызды тірегі.

       Отбасы күні – шаңырақтың қадір-қасиетін дәріптеп, ата-анаға құрмет көрсетіп, бала тәрбиесінің маңызын тағы бір мәрте еске салатын ерекше мереке. Бұл күн әр отбасына бір-біріне деген сүйіспеншілігін, қамқорлығын және ризашылығын білдіруге мүмкіндік береді.

        Қазақ халқы ежелден отбасы құндылықтарына ерекше мән берген. «Отан – отбасынан басталады» деген қанатты сөздің өзінде үлкен мағына жатыр. Үлкенді сыйлау, кішіге қамқор болу, ата-ананы ардақтау, туған-туыспен тату болу – халқымыздың ұрпақтан-ұрпаққа жалғасып келе жатқан асыл дәстүрлері. Отбасындағы жылулық пен өзара түсіністік баланың болашағына тікелей әсер етеді. Бала ата-анасының сөзінен ғана емес, олардың күнделікті іс-әрекетінен де тәрбие алады. Сондықтан отбасы мүшелерінің бір-біріне құрметпен қарап, қиын сәтте қолдау көрсетуі, қуанышты бірге бөлісуі – берік шаңырақтың басты белгілері.

     Бүгінгі таңда қоғамдағы өзгерістер мен қарбалас тіршілік отбасы мүшелерінің бірге уақыт өткізуіне кедергі келтіруі мүмкін. Алайда қандай жағдай болмасын, отбасыға көңіл бөлу, жақындармен әңгімелесу, бірге дастарқан басында отыру, балалардың қуанышы мен мәселесіне назар аудару аса маңызды. Өйткені отбасы мүшелерінің арасындағы сенім мен сүйіспеншілік материалдық дүниелерден әлдеқайда құнды.

       Берекелі отбасы – мейірімді ұрпақтың, саналы азаматтың қалыптасатын ортасы. Ал саналы әрі тәрбиелі ұрпақ – елдің жарқын болашағы. Сондықтан отбасы құндылықтарын сақтау мен нығайту тек ата-ананың ғана емес, бүкіл қоғамның ортақ міндеті.

           Сонымен қорыта айтсақ, отбасы күні – бізге қарапайым, бірақ аса маңызды бір ақиқатты еске салады: адам үшін ең үлкен бақыт – өзін жақсы көретін, түсінетін және әрдайым қолдайтын жандардың ортасында өмір сүру.

       Әр шаңырақта татулық пен тыныштық, әр отбасында қуаныш пен береке болсын! Ата-ананың мерейі үстем болып, балалардың күлкісі әр үйден үзілмесін!