БРАКОНЬЕРЛІК – ЭКОЖҮЙЕМІЗГЕ ТӨНГЕН ҮЛКЕН ҚАТЕР

       Бүгінгі таңда браконьерлік, яғни заңсыз аң-құс аулау – бізді қоршаған экожүйенің тепе-теңдігін бұзып, адамзаттың болашағына үлкен қатер төндіруде. Мұның алдын алу мақсатында біздің облысымызда да тиісті шаралар қолға алынған. Нақты айтар болсақ, 2025 жылдың 24 қаңтарында облыс әкімі Н.Көшеровтың «Түркістан облысының табиғи ресурстар және табиғат пайдалануды реттеубасқармасының «Мамандандырылған «Қорған» жедел қызметі» коммуналдық мемлекеттік мекемесін құру туралы» Қаулысы қабылданды. Бүгінде біз осы құжат негізінде қызметтер атқарудамыз.

          Қазақстан – кең байтақ даласы, асқар таулары мен ну орманы, көлдері мен өзендері тоғысқан табиғаты ерекше ел. Ұлы дала төсінде киік жортса, қыран қалықтаса, Алтай мен Алатау бөктерінде сирек кездесетін аң-құстар мекендейді. Алайда, соңғы жылдары табиғатқа төнген ең үлкен қауіптің бірі – браконьерлік. Заңсыз аң аулау мен балық аулау экожүйеге орны толмас зиян келтіріп отыр.

         Еліміздің Қызыл кітабына енген бірқатар жануарлар браконьерлердің нысанасына айналғаны жасырын емес. Киік мүйізіне деген заңсыз сұраныс, сирек құстарды аулау, бағалы балық түрлерін заңсыз аулау – табиғи тепе-теңдікті бұзады. Мамандардың айтуынша, бір ғана заңсыз аулау фактісі тұтас аймақтың биоалуантүрлілігіне әсер етуі мүмкін. Табиғатта әрбір жануардың өзіндік орны бар. Бір буын үзіліп қалса, тұтас экожүйе әлсірейді.

         Табиғатты қорғау тек инспекторлардың немесе құқық қорғау органдарының міндеті емес. Бұл – әрбір азаматтың парызы. Егер браконьерлік фактісін көрген адам үнсіз қалмай, тиісті орындарға хабар берсе, көптеген заңсыз әрекеттің алдын алуға болар еді.

         Экологиялық мәдениетті мектеп қабырғасынан қалыптастыру – ұзақ мерзімді шешім. Табиғатты аялау, жануарларға жанашырлықпен қарау, қоршаған ортаны қорғау – тәрбиенің бір бөлігі болуы керек. Жастар табиғатты тек ресурс емес, аманат ретінде қабылдаса, браконьерлік азаяр еді.

        Табиғат – бізге уақытша берілген аманат. Оны қорғау – бүгінгі буынның басты жауапкершілігі. Браконьерлікке қарсы күрес тек жазалаумен шектелмеуі керек, ол саналы көзқарас пен ортақ мүддеге негізделуі тиіс. Егер біз табиғатты сақтай алсақ, болашақ ұрпаққа жасыл орман, таза су, еркін жортқан киік пен самғаған қыранды табыстаймыз.

Бауыржан СМАНОВ,

Түркістан облысының табиғи ресурстар және табиғат пайдалануды реттеу басқармасының, «Мамандандырылған «Қорған» жедел қызметінің» инспекторы.