ҰСТАЗ — АҚЫН ОБЛЫС ӘКІМІМЕН КЕЗДЕСУГЕ ҚАТЫСТЫ

         2026 жылғы 9 ақпанда Абай облысының әкімі Берік Уәли Абай атындағы әмбебап кітапханада ақын Мұқағали Мақатаевтың туған күніне орай өңір қаламгерлерімен кездесті. Еркін қалыпта өткен жиынға облыстың қала-аудандарынан зиялы қауым өкілдері, айтыскер және жазба ақындар қатысты.

       Кездесуге Бородулиха ауданы атынан «Жезкент орта білім беретін мектебінің» қазақ тілі мен әдебиеті пәнінің мұғалімі, Қазақстан Жазушылар одағының мүшесі Жақсылық Серікбекұлы Асқарбеков арнайы шақыртумен қатысып, өңір қаламгерлерімен бірге пікір алмасты.

       Жиынды ашқан облыс әкімі зиялы қауымның қоғамдағы рухани рөлін атап өтіп, өңір мәдениетін қолдау бағытында атқарылып жатқан жұмыстарға тоқталды. Ол белгілі ақын Төлеген Жанғалиевтің мемлекеттік стипендия иегері атанғанын, айтыскер ақын Әсем Ережеқызының «Айбоз» ұлттық әдеби сыйлығын алғанын тілге тиек етті. Сондай-ақ «Абай жолы» кітапханасы сериясымен жарық көрген қаламгерлер еңбектері мен алдағы мәдени жобалар жөнінде мәлімет берді.

      Жиында облыс әкімі Абай облысының гимнін жазуға арналған «Ұлылар елі» республикалық ән байқауының басталғанын хабарлады. Байқау «Киелі Абай елі» гимндік шығармалар және «Trend auen» заманауи әндер бағытында өтеді.

      Кездесу барысында зиялы қауым өкілдері өз ұсыныс-пікірлерін білдіріп, әдебиет пен мәдениетті дамыту мәселелері талқыланды.

Атаева Мейрамгүл Балабайқызы ,
Абай облысы, Бородулиха аудандық  «Мемлекеттік және басқа тілдерді оқыту орталығының» директоры.