АҚИЫҚ АҚЫН МҰҚАҒАЛИ МАҚАТАЕВҚА АРНАЛҒАН ӘДЕБИ КЕШ ӨТТІ

        2025 жылдың 6 ақпанында «Семей қаласының орталықтандырылған кітапханалар жүйесі» кітапхана қызметкерлері мен «Ыбырай Алтынсарин атындағы № 37 гимназиясының» «Ақ қауырсын» үйірмесінің жас ақын шәкірттерінің қатысуымен «Абай облысы Семей қаласының № 3 арнаулы әлеуметтік қызметтер көрсету және белсенді ұзақ өмір сүру орталығы» КММ мүшелеріне арналған ақын Мұқағали Мақатаевтың туғанына 95 жыл толуына орай «Мұқағали жыры – ұрпақ үні» атты әдеби кеш ұйымдастырылды.

         Шара барысында кітапхана қызметкері қазақ даласын құнарлы жырымен сусындатқан, қазақ поэзиясының дарабозы Мұқағали Мақатаевтың өмірі мен шығармашылығына тоқталып, оның туған елін жырға қосқан, әр қазақтың жүрегіне ой салған қайталанбас дарын иесі екенін әдеби өрнекті тілмен баяндады. Сонымен қатар ақынның өмір жолынан сыр шертетін бейнеролик көрсетілді.

         Әдеби кеш жергілікті өнерпаз әнші Букашева Эльмира Серғазықызының ақын сөзіне жазылған «Есіңе мені алғайсың» әнін орындауымен жалғасты. Бұдан кейін «Ыбырай Алтынсарин атындағы № 37 гимназиясының» «Ақ қауырсын» үйірмесінің жас ақын шәкірттері ақынға арнаған авторлық өлеңдерін оқыды.

         Шара соңында ақынның жарық көрген кітаптары мен мерзімді басылым беттерінде жарияланған мақалаларына шолу жасалды.

           Барлық қатысушыларға Алғыс хаттар табыс етілді. Соның ішінде «Ақ қауырсын» үйірмесінің шәкірттері — Жасарбек Расул, Идрисова Інжу, Мақсатбек Медина, Жұмағазы Әдемі, Мамеева Айлин арнайы Алғыс хатпен марапатталды.

             Осындай әдеби кешке дарынды шәкірттерді дайындап, қатыстырғаны үшін «Ақ қауырсын» үйірмесінің жетекшісі Омарғалиев Ерік Қайратбекұлына шынайы алғыс білдіріліп, естелік сый ретінде өлеңдер жинағы табысталды.

Асқар БЕКТҰРҒАН,

журналист.

Семей қаласы.