АСЫҚАТАДА ШАҒЫН ӨНДІРІСТІК ПАРК ҚҰРЫЛЫСЫ ҚАРҚЫН АЛУДА

        Бүгінде Жетісай ауданының Асықата кентінде жалпы аумағы 1 гектарды құрайтын жаңа шағын өндірістік парктің құрылысы қарқынды жүріп жатыр. Құны 210 млн. теңгеге бағаланған осы нысанда бес түрлі өндіріс орыны ашылып, келешекте 100-ге жуық тұрғын тұрақты жұмыспен қамтылмақ.

        Бұл өндірістік парк аумағында түйіршіктелген құрама жем өндіру, темір бұйымдарын дәнекерлеу, құрғақ құрылыс қоспаларын шығару, тұрмыстық химия өнімдері (құрғақ және сұйық ұнтақ, кір сабын, сусабын) өндірісі, сондай-ақ әжетхана қағазы мен майлықтар дайындау цехтары жұмыс істейтін болады.

        Аудан басшысы Серік Мамытов пен аудандық мәслихат төрағасы Медет Қасымовтар аталмыш нысанда болып, құрылыс барысын көзбен көрді. Жергілікті инвесторлармен кездесу барысында аудан әкімі жобаларды белгіленген мерзімде әрі сапалы аяқтаудың маңызын атап өтті.

      «Белгіленген жоспарға сай өндірістік паркте бес инвестициялық жоба іске асырылады. Ауданда салынған жаңа индустриялды аймақты және осы шағын өндірістік паркті тиімді пайдалану — экономикалық өсіміміздің маңызды факторы. Инвесторларға заң аясында барлық қажетті қолдау көрсетіледі. Асықата кенті мен оған жақын Ынтымақ, Жаңа ауыл, Қазыбек би округтерінің әлеуеті өте жоғары», — деді Серік Үсенұлы.

        Айта кетерлігі соңғы бес жылда Жетісай ауданына жалпы құны 90,2 млрд. теңге көлемінде инвестиция тартылған. Құрылысы жүріп жатқан индустриялды аймақ пен шағын өндірістік парк мақталы өңірдің өндірістік әлеуетін арттырып, жаңа кәсіпорындардың ашылуына жол ашары анық. Сондай-ақ, 2030 жылға қарай ауданға тартылатын инвестиция көлемін 419,6 млрд. теңгеге дейін жеткізу жоспарланып отыр.