БАҚША ӨНІМДЕРІН ЖИНАУ ҚАРҚЫНДЫ ЖҮРІП ЖАТЫР

           Мақтаарал ауданында биылғы егін жинау науқаны қызу жүріп жатыр. Диқан қауымы көктемгі маусымда төккен маңдай терінің жемісін көріп, ерте пісетін бақша өнімдерін ішкі нарықпен қатар экспортқа жөнелтуде. Ауыл шаруашылығы саласындағы жүйелі жұмыстардың нәтижесінде ауданның егіс алқаптарында өнім мол болып, шаруалардың табысы артып келеді.

          2026 жылғы 20 шілдедегі жедел мәліметке сәйкес, аудан бойынша бақша дақылдары 16 128 гектар алқапқа егілген. Бүгінгі күнге дейін оның 5 705 гектары суғарылып, суармалы егіншілікті тиімді ұйымдастыру жұмыстары жүйелі түрде жүргізілуде. Тек бір тәуліктің өзінде 560 гектар алқапқа су берілген.

         Қазіргі таңда бақша өнімдерін жинау жұмыстары да қарқын алған. Аудан бойынша осы уақытқа дейін 21 848 тонна бақша өнімі жиналды. Оның ішінде 17 508 тоннасы жаппалы қауын болса, қалған бөлігін қарбыз бен өзге бақша дақылдары құрайды. Бұл көрсеткіштер мақтааралдық шаруалардың мол тәжірибесі мен тынымсыз еңбегінің нәтижесін айғақтайды.  Сонымен қатар, мал азығы қорын қалыптастыру бағытындағы жұмыстар да назардан тыс қалған жоқ. Биыл аудан көлемінде 1 596 гектар жаңа жоңышқа және 2 241 гектар ескі жоңышқа өсірілуде. Бұдан бөлек, 163 гектар алқапқа сүрлемдік жүгері егілген. Бұл жұмыстар мал шаруашылығының жемшөп қорын нығайтуға мүмкіндік береді.

         Ауыл шаруашылығы саласының тұрақты дамуына мемлекеттік қолдау шаралары, су үнемдеу технологияларын енгізу, заманауи агротехниканы пайдалану және шаруалардың тәжірибесі оң ықпал етуде. Әсіресе, су ресурстарын тиімді пайдалану бүгінгі күннің басты талаптарының бірі болып отыр.

         Мақтааралдық диқандардың қажырлы еңбегі нәтижесінде өндірілген сапалы өнімдер еліміздің әр өңіріне және шетел нарығына жөнелтіліп, ауданның аграрлық әлеуетін арттыруға үлес қосуда. Егін жинау науқаны әлі де жалғасуда. Сондықтан алдағы уақытта өнім көлемі бұдан да артып, ауыл еңбеккерлерінің табысы еселене түседі деген сенім мол.

Қ.ҚУАНЫШБЕКҰЛЫ.