2026 ЖЫЛДЫҢ БАСЫНАН БЕРІ 69 МЫҢНАН АСТАМ ҚАЗАҚСТАНДЫҚ СУБСИДИЯЛАНАТЫН ЖҰМЫС ОРЫНДАРЫНА ОРНАЛАСТЫРЫЛДЫ

         Қазақстан Республикасының Әлеуметтік кодексінде бекітілген халықты жұмыспен қамтуға жәрдемдесу шараларын іске асыру аясында ҚР Еңбек және халықты әлеуметтік қорғау министрлігі азаматтарға еңбек тәжірибесін жинақтауға, табысын арттыруға және еңбек нарығындағы орнын нығайтуға мүмкіндік беретін субсидияланатын жұмыс орындарын құруды жалғастыруда. 2026 жылғы 1 маусымдағы жағдай бойынша субсидияланатын жұмыс орындарына 69,8 мыңға жуық адам орналастырылды, деп хабарлайды ҚР Еңбек және халықты әлеуметтік қорғау министрлігі.

        Субсидияланатын жұмыс орындары жұмыс берушілермен еңбек мобильділігі орталықтарының (мансап орталықтары) арасындағы шарттық негізде құрылады және жұмыссыздарды, сондай-ақ жұмыс іздеу кезінде қосымша қолдауды қажет ететін халықтың жекелеген санаттарын жұмысқа орналастыруға арналған.

         Қазіргі уақытта субсидияланатын жұмыспен қамтудың төрт негізгі бағыты іске асырылуда: қоғамдық жұмыстар, әлеуметтік жұмыс орындары, жастар тәжірибесі және «Күміс жас» жобасы.

       Қоғамдық жұмыстар ең сұранысқа ие бағыт болып қала береді. Бұл бағыт жұмыссыздарды, студенттер мен жалпы білім беретін мектептердің жоғары сынып оқушыларын оқудан бос уақытында уақытша жұмыспен қамтуға мүмкіндік береді. Қоғамдық жұмыстардың ерекшелігі – олардың өңірлер үшін әлеуметтік, экономикалық және экологиялық маңыздылығында. Осы жылдың 1 маусымындағы жағдайға сәйкес қоғамдық жұмыстарға 49,6 мың адам тартылды. Қатысушылардың еңбекақысы 24 АЕК-тен кем емес, яғни 103,8 мың теңгені құрайды.