22 ЖЕЛТОҚСАН – АРХИВШІЛЕР КҮНІ

           Архив – тарихи шежіре қоймасы ғана емес, әрбір ұлт тарихының қазынасы да. Сонымен бірге, ол жер ата-бабаларымыздың құнды тарихын ғана емес, олардың арман-тілегін, ақыл-ойын, даналығы мен даралығын, парасаты мен үлгі-өнеге өсиеттерін сақтап отыратын киелі орын. Осыны ескере отырып, Қазақстан архивтерінің мемлекет тарихының қалыптасудағы рөлі өте зор деп нық сеніммен айта аламыз. Себебі, олар халықтың құжаттық жадын бір талдап жинап, өскелең ұрпақ үшін сақтайды.

          1948 жылы ЮНЕСКО-ның шешімімен «Халықаралық архивтер кеңесі» құрылса, 2007 жылдың қарашасында Канаданың Квебек қаласындағы Бас ассамблеяда «9 маусым – Халықаралық архивтер күні» деп ресми түрде бекітілді. Ал біздің елімізде архившілер күні 2020 жылы Үкіметіміздің қаулысымен 22 желтоқсан деп бекітілді. Ерте кездерден бері архивтік деректер адамзаттың саяси тарихы, экономикалық және әлеуметтік дамуының құжаттарын жинайтын негізгі мекеме саналып келетіндіктен, «Архивщілер күні» тек сол  сала мамандарының кәсіби мерекесі ғана емес, бүкілхалықтық мереке деп нық сеніммен айтуға болады.

         1990 жыл­дардағы оңтайландыру ісі қол­ға алынған кезде, өкінішке орай архив саласы ең соңғы кезекке ысырылып, тіпті, басқа салалардың мәселесімен де ай­на­лысуға мәжбүр болып кеткендіктен бұл сала құлдырап кеткен болатын. Ал қазіргі таңда жағдай оңалып, архив ісін дамыту мықтап қолға алынғандықтан жандану үстінде. Біздің қызметкерлер алыс-жақын шетелдердің архивтерінде қызметтік тәжірибеден өтіп, кәсіби білім алып, саланы дәстүрге айнала бастаған заманауи форматта дамытуда. Себебі олар мәңгілік сақтауға алынған ұлттық қорды өз істеріне адал беріле отырып көздің қарашығындай қорғау, архив қызметкерлерінің қасиетті борышы екендігін жақсы біледі.

        Қорыта айтсақ,  «Өткен күн – кешегі тарих, келер күн – ертеңгі сыр, бүгінгі күн – үлкен сый» деп Қорқыт атамыз айтқандай, болашақ ұрпаққа рухани мұра қалдыру жолында еңбектене бермекпіз.

Ақбаян ОРТАЕВА,

Жетісай өңірлік мемлекеттік архивінің Асықата бөлімі архивисі.