ДОСТЫҚТЫ ДӘРІПТЕГЕН ЖАРЫС ӨТКІЗІЛДІ

         Елімізде 2016 жылдан бері жалпыұлттық деңгейде аталып келе жатқан «1 наурыз – Алғыс айту күні» қарсаңында, Жетісай ауданының адами әлеуетті дамыту бөлімінің А.Жами атындағы №24 жалпы орта мектебінде түрлі ұлт өкілдері арасында «Толағай» отбасылық сайысы болып өтті.

          Ата-аналар мен балалардың, жасөспірімдердің арасында салауатты өмір салтын насихаттай отырып олардың бос уақыттарын тиімді ұйымдастыруларына дағдыландыру, қылмыс пен ұсақ құқық бұзушылықтардың алдын алу, зиянды әдеттерден бойларын аулақ ұстауларына ықпал ету, отбасының қадір-қасиетін кеңінен ұғындыра отырып өзара достық қарым-қатынасты насихаттау және топтасып жұмыс жүргізуге баулу мақсатында ұйымдастырылған шараның ашылуына Жетісай ауданының адами әлеуетті дамыту бөлімінің әдіскерлері Аязхан Елемесов пен Бағдәулет Нұрасаров, Түркістан облысы қоғамдық даму басқармасының «Қоғамдық келісім» КММ Жетісай аудандық филиалының басшысы Құрманбек Рысмаханов, А.Жами атындағы №24 жалпы орта мектебінің директоры Тұңғат Татибаев қатысты.

           Қатысушыларды айтулы мерекемен құттықтап, отбасы құндылықтары мен ұрпақтар сабақтастығы, ұлтаралық татулық пен ынтымақ жайында ғибратты әңгімелерін айтып, ақыл-кеңестерін берді. Сәттілік тіледі.

           Айта кетейік, аталмыш сайыстың жоғары деңгейде ұйымдастырылып өтуіне мектеп директорының тәрбие ісі жөніндегі орынбасары Әуезхан Әбдіхалықов пен дене шынықтыру пәні бірлестігінің ұстаздары атсалысты.

          Спортпен үнемі айналысып, ұрпағының қамын ойлаған адам ғана қоғамның толыққанды белсенді мүшесі болмақ. Бұл тұжырымға тартысты өткен сайыс барысында толық көз жеткізілді. Өйткені, 7 бөлімнен тұратын сайыстың алғашқы кезеңдерінен бастап жеңіске деген жігері мен үлкен дайындықтарын көрсете білген командалар көрермендердің құрметіне бөленді.

           Салауатты өмір салтын ұстанған жас отбасылар арасындағы сайыста жеңіске жетіп, ептілік танытқан «Бүркіт» отбасылық командасы жүлделі ІІІ орынды иеленсе, ІІ орын «Қыран» командасына, І орын «Арыстан» командасына бұйырды. Ал, бас жүлде «Барыс» командасының қанжығасына байланып, жеңімпаз атанды.

          Жарыс соңында жеңімпаз командалар мен өзге де қатысушылар ұйымдастырушылар тағайындаған дипломдар мен бағалы сыйлықтарға ие болды.

Б.НАЙМАНОВ, Жетісай қаласы.