АУДАНДА АУҚЫМДЫ СЕНБІЛІК ӨТТІ

            Түркістан облысы әкімінің бірінші орынбасары А.Жетпісбайдың жергілікті жерлердегі тазалық шараларын ұйымдастырып өткізу туралы хатына сәйкес, басқа өңірлер секілді біздің Жетісай ауданында да ауқымды сенбілік жұмыстары жүргізілді.

           Жетісай ауданының әкімі Мұрат Болатұлының қатысуымен қала, кент және барлық ауылдық округтерде өткен жаппай сенбілік жұмыстарында аудан тұрғындары арасында көшелер мен елді мекендердегі тазалықты сақтауға жұмылдыру ісінде аудан басшысының орынбасарлары мен бөлім басшылары, жергілікті әкімдер мен тұрғындар белсенділік танытып, жер-жерлерде арнайы бекітілген кесте негізінде жұмыстар жүргізілді.

            Аталмыш сенбілік аясында мемлекеттік және квазимемлекеттік қызметкерлер өздеріне бөліп бекітілген көшелерде тазалық жұмыстарын жүргізсе, ауданның әрбір тұрғыны үй іргелік жерлерін күл-қоқыстардан, жапырақтардан тазартты. Сонымен қатар, сенбілік барысында саябақтар мен көшелер, арық-атыздар тазаланды.

          «Күн жылынғаннан бастау алатын тазалық жұмыстарымызға қатысушылардың саны күн санап артып келеді. Бұл дегеніміз – тұрғындардың туған өлкеге деген махаббаты, жанашырлығы деп білеміз. Қазірде аудан аумағында тазалықты сақтау мақсатында арнайы түсіндіру жұмыстарын тынымсыз жүргізіп жатырмыз. Құдай қаласа алдағы уақыттарда аудан аумағына түрлі көшеттерді отырғызып, жасыл аймаққа айналдыратын боламыз» дейді аудан басшысы.

          Сонымен қатар, Мұрат Болатұлы ауылдық округтерді аралап, көктемгі мезгілдерде орын алуы ықтимал су тасқындарының алдын алу, қажетті ағын суларды тұрғындардың егістіктер мен үй іргелік жерлеріне кедергісіз алуын қамтамасыз ету мақсатында тазалық жұмыстары жүргізіліп жатқан су шаруашылығы нысандары мен арық-атыздарды, ішкі каналдар мен көпірлердің астын көріп шықты.

            Бұдан бөлек аудан әкімі «SYRDARIYA SPORT» спорт кешенінің жұмысымен танысты. Мұнда келушілер мен спорттық үйірмелерге қатысушыларға жасалған жағдайларға жоғары бағасын берді.

             Айта кетейік, аудан көлемінде өткен сенбілік шарасын ұйымдастырушылар тазалық жұмыстары тек орталықтарда ғана емес барлық округтерде, елді мекендерде жыл он екі ай жалғасатындығын, әрбір мекеме мен әрбір аула тұрғындарға бекітіліп беріліп, тазалықты сақтауға ауыл ақсақалдары да жұмылдырылатынын айтады.

Б.НАЙМАНОВ, Жетісай ауданы.