БАЛАЛАР ҚАУІПСІЗДІГІ – БАСТЫ НАЗАРДА
Posted by: Қалмұрат
in Жас буын, Қоғам, Өзекті мәселе
17/06/2026
4 Views
Жаз мезгілінің басталуымен бірге су айдындары мен бассейндерде демалушылар саны арта түсетіні белгілі. Осыған байланысты Мақтаарал ауданында балалардың қауіпсіздігін қамтамасыз ету және жазатайым оқиғалардың алдын алу мақсатында кешенді түсіндіру-профилактикалық іс-шаралар ұйымдастырылды.
Мақтаарал аудандық төтенше жағдайлар бөлімінің бастамасымен өткен шараның негізгі мақсаты – тұрғындардың, әсіресе балалар мен жасөспірімдердің судағы қауіпсіздік мәдениетін қалыптастыру, ата-аналардың жауапкершілігін арттыру және қайғылы оқиғалардың алдын алу болды.
Іс-шараға аудандық төтенше жағдайлар бөлімінің қызметкерлері, бассейн иелері, кәсіби құтқарушылар, демалыс орындарының қызметкерлері және жергілікті тұрғындар қатысты. Шара аясында алдымен аудандық төтенше жағдайлар бөлімінің бастығы, азаматтық қорғау полковнигі А. Жақияев пен «Фуд Сити» демалыс орталығының басшысы, кәсіпкер Н. Сақтағанов әлеуметтік маңызы бар өзара ынтымақтастық туралы меморандумға қол қойды. Бұл құжатта әлеуметтік осал санаттағы балалардың бассейнге тегін келуіне мүмкіндік жасау, оларға судағы қауіпсіздік ережелерін үйрету, сондай-ақ кәсіби құтқарушылардың қатысуымен жүзу дағдыларын меңгерту көзделген. Бұл бастама балалардың жазғы демалысын қауіпсіз әрі мазмұнды ұйымдастыруға, олардың өмірі мен денсаулығын қорғауға бағытталған маңызды әлеуметтік жоба болып табылады.
Кейін төтенше жағдайлар бөлімінің мамандары бассейнде демалып жүрген балалар мен жасөспірімдерге арнайы қауіпсіздік сабақтарын өткізді. Онда судағы тәртіп ережелері, терең суға түсудің қауіптілігі, белгіленбеген орындарда шомылудың зардаптары және төтенше жағдайда дұрыс әрекет ету жолдары жан-жақты түсіндірілді.
Мамандар балалардың қараусыз қалуының ауыр зардаптарға әкелуі мүмкін екенін ескертіп, ата-аналарды әрдайым сақ болуға шақырды. Сонымен бірге соңғы жылдары жиілеп кеткен балалардың тұрғын үйлердің терезесінен құлау оқиғаларының алдын алу мәселесіне де ерекше көңіл бөлінді. Ата-аналарға қауіпсіз орта қалыптастырудың маңыздылығы түсіндіріліп, балаларды қараусыз қалдырмау жөнінде нақты ұсыныстар берілді.
Практикалық бөлімде құтқарушылар суға батып бара жатқан адамға алғашқы көмек көрсету тәсілдерін көрсетіп, тұншығу кезінде орындалатын қарапайым әрекеттер алгоритмін түсіндірді. Балалар мен ересектерге алғашқы медициналық көмектің негізгі қағидалары үйретіліп, төтенше жағдайда сабыр сақтап, мамандарды дер кезінде шақырудың маңыздылығы айтылды.
Іс-шара соңында қатысушыларға судағы қауіпсіздік ережелері мен төтенше жағдайлардың алдын алу шаралары жазылған арнайы жадынамалар таратылды. Ұйымдастырушылар мұндай түсіндіру жұмыстары шомылу маусымы бойы аудан аумағындағы демалыс орындарында тұрақты түрде жалғасатынын жеткізді.
2026-06-17
САЙЫПҚЫРАН.KZ Ақпаратты-сараптамалық порталы АҚПАРАТ ӘЛЕМДІ БИЛЕЙДІ!
