STAEM ӘДІСІНІҢ БАСТАУЫШ СЫНЫП ОҚУШЫЛАРЫН ДАМЫТУДАҒЫ РӨЛІ

         Бүгінгі таңдағы білім беру жүйесінің басты талабы – оқушыны жан-жақты дамыған, өз ойын еркін жеткізе алатын, зерттеушілік қабілеті жоғары тұлға ретінде қалыптастыру. Осы мақсатта заманауи педагогикада STAEM әдісі (Science, Technology, Art, Engineering, Mathematics) кеңінен қолданылып келеді. Бұл әдіс бастауыш сынып оқушыларының білімін тек пәндік деңгейде ғана емес, өмірлік дағдылар тұрғысынан дамытуда аса тиімді.

       STAEM – ғылым, технология, өнер, инженерия және математиканы біріктіріп оқытуға бағытталған модель. Мұндай тәсіл бастауыш жастағы балалар үшін өте пайдалы, себебі олар дүниені тұтастай қабылдайды. Бір тақырып аясында тәжірибе жасау, мультимедиялық құралдарды пайдалану, модель құрастыру, есеп шығару, сурет салу сияқты әрекеттер оқушыны жан-жақты дамытады.

        Бастауыш кезең – баланың табиғи қызығушылығы мен зерттеуге деген құлшынысы ерекше уақыт. STAEM әдісі дәл осы қасиеттерді ашады:

• Сұрақ қою, шешім іздеу дағдысы қалыптасады;

• Қарапайым тәжірибелер арқылы ғылыми ойлау дағдылары дамиды;

• Жобалық жұмысқа қатысу арқылы оқушы өз бетінше әрекет етуге үйренеді.

        Мысалы, «Су қалай тазарады?» тақырыбында оқушылар су сүзгісінің моделін жасай отырып, табиғат құбылыстарын түсінеді және инженерлік ойлауын дамытады.

         STAEM-нің ерекшелігі – өнер бағытының енгізілуі. Өнер пәні мен технологияны байланыстыру шағын жобалар жасауда ерекше нәтижелер береді. Оқушылар:

• қолөнер мен цифрлық құралдарды бірге пайдаланады;

• макет, бейнежоба, презентация дайындайды;

• топтық жұмыс арқылы коммуникативтік қабілетін жетілдіреді.

       Бұл – қазіргі цифрлық қоғамда аса қажет дағдылар. STAEM әдісі бастауыш сынып оқушысының:

• логикалық ойлауын,

• шығармашылық әлеуетін,

• коммуникациялық мәдениетін,

• ынтымақтастықта жұмыс істеу қабілетін,

• жауапкершілік пен дербестігін дамытады.

        Оқушы білім алушы ғана емес, жобалаушы, зерттеуші, ойлап табушы рөліне енеді.

        Сонымен қорыта айтар болсақ, STAEM әдісі – бүгінгі таңда бастауыш мектепте оқытудың тиімді, заманауи және баланың табиғи болмысына сай әдіс болып табылады. Ол оқушыны тек біліммен қаруландырып қана қоймай, тәжірибе жасайтын, ойлайтын, әрекет ететін, болашақтың құзыретті тұлғасын қалыптастырады. Яғни, мектеп тәжірибесінде STAEM тәсілін жүйелі енгізу – сапалы білімнің кепілі.

Каримова Акмарал Нуриддиновна,

 Хиуаз Доспанова атындағы №28 ЖББМ бастауыш сынып мұғалимасы,

Жетісай ауданы.