АБАЙ КҮНІ — ҰЛЫ МҰРАНЫ ҰЛЫҚТАУ КҮНІ

          Ұлт тарихында мәңгілік тұлғалар болады. Олардың өмірі мен шығармашылығы бір ұрпақтың ғана емес, тұтас халықтың танымына, болмысына, болашағына айналады. Сондай теңдессіз тұлғалардың бірі – Абай (Ибраһим) Құнанбайұлы. Қазақ халқының данышпан перзенті, ұлттық руханияттың темірқазығы саналатын Абайға тағзым ету – халқымыздың рухани жауапкершілігі. Осы орайда, Қазақстан Республикасы Президентінің Жарлығымен 10 тамыз – Абай күні ретінде ресми бекітіліп, жыл сайын ел көлемінде аталып өтіп келеді. Бұл — қазақ руханиятының биікке көтерілген, ел болып еңселенген күні.

           10 тамыз – Абай Құнанбайұлының туған күні. Ұлы ақынның өмір жолы мен шығармашылығы – қазақ халқының рухани жаңғыруының алтын арқауы. Абай күнін арнайы мереке ретінде бекіту – тәуелсіз Қазақстанның рухани саясатындағы аса маңызды тарихи қадамдардың бірі. Бұл күн елдің өткеніне, бүгінгісіне және ертеңіне үңілудің, ұлттың өзін-өзі тануы мен қайта түлеуінің символына айналды.

         Абай күні – тек әдеби мереке емес. Бұл – ұлттық танымды жаңғырту, ізгілік пен парасат, білім мен ғылым, әділет пен адамгершілік құндылықтарын ұлықтау күні. Себебі, Абай мұрасы – адам болмысының терең сырын ашатын, бүгінгі қоғамға бағдар болатын даналық мектебі.

         Абай – тек ақын емес. Ол – ойшыл, философ, ұстаз, реформатор. Оның шығармаларында ел мен жер тағдыры, адам мен қоғам қатынасы, ғылым мен дін, сана мен сезім, білім мен еңбек ұғымдары тереңінен көрініс табады. Абайдың “Қара сөздері” – ұлттық философияның негізін қалаған рухани ескерткіш. Ақынның “Толық адам” тұжырымдамасы бүгінгі қоғамның құндылықтар жүйесімен үндесіп жатыр.

         Абай күні – осы құндылықтарға қайта үңіліп, оны ұрпаққа жеткізудің, насихаттаудың, жас ұрпақтың бойына сіңірудің күні.

         Жыл сайын 10 тамызда ел көлемінде Абай оқулары, ғылыми-тәжірибелік конференциялар, дөңгелек үстелдер, театрландырылған көріністер, көрмелер, әдеби байқаулар, поэзия кештері өтеді. Бұл тек ресми шаралар ғана емес, ұлт санасына қозғау салатын тәрбиелік мәні зор мәдени-рухани құбылыс. Әсіресе, мектеп оқушылары мен студенттер арасында Абайдың өлеңдерін жатқа оқу, қара сөздерін талдау, шығармаларын сахналау дәстүрге айналды.

         Хакім Абайдың мерейтойларын әлемдік деңгейде атап өту де – оның мұрасының тек қазақ халқына ғана емес, бүкіл адамзатқа ортақ құндылық екенін көрсетеді. 2020 жылы ақынның 175 жылдық мерейтойы ЮНЕСКО аясында халықаралық деңгейде аталып өтті.

          Бүгінгі «Абай күнінің» басты миссиясы – рухани жаңғыру идеясын нақты іспен ұштастыру. Абай мұрасын зерттеу, дәріптеу, оқу мен оқыту жүйесіне енгізу – бұл күннің қоғам үшін маңызын арттыра түседі. Абай күні – өзімізге, ұлттық коды­мызға, төл болмысымызға оралатын күн.  Абайдың: “Адамның адамшылығы – ақыл, ғылым, жақсы ата, жақсы ана, жақсы құрбы, жақсы ұстаздан болады” — деген сөзі бүгінгі ұрпаққа арналған аманат іспетті.

        Абай күні – мәңгілік елдің рухани мерекесі. Бұл күн – өткенге тағзым, бүгінге ой, келешекке үміт ұялататын ұлы күн. Абай әлемі – біздің рухани биігіміз, ішкі жаңаруымыздың бастауы. Ұлы ақынның мол мұрасын тану арқылы біз өзімізді, өз болмысымызды танимыз.

       Абай күні – әр қазақтың жүрегінде орын алуы тиіс ұлттық мереке. Руханияттың шамшырағына айналған бұл күн — мәңгілік Абайдың мәңгілік идеяларымен үндесіп жатуы тиіс.

«Ауыл» партиясы Абай облысы бойынша өңірлік филиалының баспасөз қызметі.