САММИТТЕ ПРЕЗИДЕНТІМІЗ МАҢЫЗДЫ БАЯНДАМА ЖАСАДЫ

          Қазақстан Президенті Қасым-Жомарт Кемелұлы Тоқаев екінші «Орталық Азия – Қытай» саммитіне қатысып, маңызды баяндама жасады. Саммитке Қытай Халық Республикасының Төрағасы Си Цзиньпин және Қырғызстан, Тәжікстан, Түрікменстан мен Өзбекстан мемлекеттерінің басшылары қатысты.

        Салтанатты жиынды ашқан Мемлекет басшысы қатысушы елдер басшыларына алғысын білдіріп, өңірлік ынтымақтастықтың дамуындағы Қытайдың рөлін ерекше атап өтті.

        – Жиынға қатысып отырған Орталық Азия мемлекеттерінің өзара сенімі мен ортақ күш-жігерінің нәтижесінде тату көршілік қарым-қатынасқа, достық пен қолдауға арқа сүйеген ынтымақтастықтың бұрын-соңды болмаған үлгісі қалыптасты. Осы ретте аса көрнекті мемлекет қайраткері, Төраға Си Цзиньпин басқаратын Қытай елінің белсенді әрі тиімді рөлін атап өткеніміз дұрыс. Көршілес Қытай Қазақстанның мәңгі әрі стратегиялық серіктесіне, нағыз досына айналды, – деді Қасым-Жомарт Тоқаев.

         Президент өз сөзінде Орталық Азияның 80 миллионнан астам халқы бар, табиғи ресурстарға бай, қарқынды дамып келе жатқан өңір ретінде халықаралық қатынастар мен сауда-экономикалық, инвестициялық және гуманитарлық ынтымақтастықтың маңызды субъектісіне айналып келе жатқанын атап өтті.

        – Қытай Халық Республикасымен сан қырлы ықпалдастық – осы үдерістегі негізгі фактор. Орталық Азия мен Қытай арасындағы байланыстар кез келген жағдайға бейімделе алатын, жан-жақты және стратегиялық сипатқа ие мәңгілік серіктестік деңгейіне көтерілді, – деді Мемлекет басшысы.

         Қасым-Жомарт Тоқаев осы саммит барысында Қытаймен арадағы байланыстарды одан әрі тереңдету қажеттігін, қолда бар мүмкіндіктерді тиімді пайдалану екіжақты ынтымақтастыққа тың серпін беретінін айтты.