БАЛЫҚ ШАРУАШЫЛЫҒЫН ДАМЫТУ – ТАБЫСҚА ЖЕТУДІҢ ТЫҢ ТӘСІЛІ

          Егер де бүгінде тауарлы балық түрлерін өсіру бойынша елімізде Түркістан облысы көш басында тұрған болса, соңғы жылдары  Жетісай ауданында да тауарлы балық шаруашылығымен айналысуға деген қызығушылық артып келеді.

          «Мемлекет басшысы Қасым-Жомарт Кемелұлы Тоқаевтың ауыл шаруашылығын дамытпай бәсекеге қабілетті экономика құру мүмкін еместігін атап өтіп, оның ішінде балық шаруашылығына да ерекше мән беруді тапсырған болатын. Нәтижесінде, мемлекет тарапынан балық өсіруге пайдаланылатын азықты сатып алуға жұмсалатын шығындарды субсидиялау бағдарламасы балық шаруашылығын дамытуға оңды ықпалын тигізіп келеді» деген болатын  аудан әкімі Серік Үсенұлы, халықпен өткен кездесулердің бірінде.

           Ауданымыздағы Атамекен ауылдық округі, Атамекен елді мекенінің тұрғыны, жеке кәсіпкер Өмірзақ Маханов бұған дейін мал шаруашылығымен, диқаншылықпен айналысып келген болатын. Соңғы уақытта жеке қаржысы есебінен 10 миллион теңгеге жуық инвестиция салып, балықтың дөңмаңдай (толстолоб) мен амур, сазан сынды түрлерінің 500 мың дана шабағын Шардара ауданынан алып келді. Бүгінде аумағы 10 сотоқты, тереңдігі 2 метрді құрайтын жасанды су тоғанында өндіріліп, өсіріліп жатқан балықтардың орташа салмағы 1 келіге жетеді.

         Мемлекеттік бағдарламалар аясында шаруаларымызға жасалып жатқан қолдаулардың тиімділігі мен артықшылықтарын тиімді пайдаланып отырған Өмірзақ Маханов алдағы уақыттарда балық асырау бассейндерінің аумағын 50 сотоққа дейін жеткізуді жоспарлап отыр.

Бауыржан НАЙМАНОВ, Жетісай ауданы.