КЕНТІМІЗДЕ БІРНЕШЕ КӘСІПКЕРЛІК НЫСАНДАРЫ АШЫЛДЫ

     Бүгінгі таңда түрлі ұлт өкілдерінің құт мекеніне айналған Мырзакент кентінде 15 617 азамат тұрады. Оларға үлкенді-кішілі 100-ге жуық дүкендер мен 30-ға жуық кафелер мен асханалар қызмет көрсетуде.

        2022 жылы ауданымызда «Еңбек» мемлекеттік бағдарламасы аясында «2021-2025 жылдарға арналған кәсіпкерлікті дамыту жөніндегі ұлттық жоба» негізінде бизнес-идеяларын іске асырғысы келген 224 азамат қайтарымсыз грант иегері атанған. Олар – кондитерлік өнімдер, тігін өнеркәсібі, сүт өнімдері, жартылай дайын тағамдар, нан өнімдері, қазы бургер, сыйлық түрлерін жасау, ұялы телефон әсемдеу, омарта шаруашылығы, жүннен тоқылатын өнімдер, фотостудия, көлік жабдықтарын жасау, жылыжай шаруашылығы, қуырылған балмұздақ, жиһаз жасау, компьютерлік қызмет көрсету, бухгалтерлік қызмет көрсету, дәнекерлеу ісі, мал шаруашылығы салаларында өз кәсіптерін бастаған болатын. Солардың арасында 29 жасқа дейінгі жастар, атаулы әлеуметтік көмекті алушылар, көпбалалы отбасылар, мүмкіндігі шектеулі жұмысқа жарамды азаматтар, мүгедек бала тәрбиелеуіндегі отбасылар, асыраушысынан айырылған отбасылар бар. Бір қуантарлығы солардың арасында мырзакенттіктер де бар.

        Ал кентіміздегі экономикалық жағдайға келетін болсақ, 2022 жылдың өзінде бізде бірнеше кәсіпкерлік нысандары ашылды. Атап айтатын болсақ, С.Қожанов көшесі бойынан 2 қабатты «Имран» сауда орталығы, оның жанынан тамақтану орны, «Азамат» кафесінің жанынан бірқатар кәсіпкерлік нысандары, Өркен көшесі бойынан «Жиделі – Байсын» тойханасы, кентіміздегі орталық стадионның алдынан бір қатар кәсіпкерлік нысандары және Мадиходжаев көшесі бойынан «Ершабай» кафесі ашылды. Биылғы жылы олардың қатары жас кәсіпкерлермен толығары анық. Себебі, мемлекеттік бағдарлама аясында жеңілдетілген шарттармен олар 7 миллион теңгеге дейін қаржы алып, өз кәсіптерін ашу мүмкіндіктеріне ие болып отыр.

Нурсултан ТУГАЙБАЕВ,

Мырзакент кенті әкімі аппаратының кәсіпкерлікті дамыту бойынша жетекші маманы.