АУДАН ӘКІМІ СЕКТОРЛАРДЫҢ ЖҰМЫСЫМЕН ТАНЫСТЫ

         Жетісай ауданының әкімі Мұрат Қадырбек бүгін «Күлпаршын» базарында орын алған өрттен материалдық шығынға ұшыраған кәсіпкерлерлерге арналған секторларды аралап, ондағы атқарылып жатқан жұмыстармен танысты. Келушілермен тілдесіп, мәселелеріне қанықты.

         Түркістан облысы әкімінің орынбасары Арман Сәбитовтың төрағалығымен облыстық басқармалар мен ҚР Қаржы нарығын реттеу және дамыту агенттігінің басшылары, «Атамекен» кәсіпкерлер палатасының басшылары мен АҚ «Түркістан әлеуметтік кәсіпкерлер корпорациясы» өкілдері, екінші деңгейлі банктердің (Жусан банк, НұрБанк, Каспий банк, Халық банк) аудандық бөлімше басшылары мен «Ырыс» МКҰ ЖШС басқарма басшыларының қатысуымен өткен жиында облыстық кәсіпкерлік және сауда басқармасы мен «Түркістан» әлеуметтік-кәсіпкерлік корпорациясы» АҚ, «Ырыс» МКҰ ЖШС басқармасына заң талаптарына сай «Күлпаршын» базарының зардап шеккен кәсіпкерлеріне жеңілдетілген несие бойынша түсіндіру жұмыстарын жүргізіп, несие беру жолдарын қарастыруды, сондай-ақ, «Ырыс» МҚҰ тарапынан берілетін жеңілдетілген несие лимитін толықтыру жұмыстарын жүргізуді қадап тапсырған болатын. Осыған байланысты өрттен зардап шеккен кәсіпкерлердің құжатын қабылдауға Жетісай қаласынан 6 сектор іске қосылған. Әр секторда әкімдік қызметкерлерімен қатар «Ырыс» МҚҰ мамандары тиісті құжаттарды қабылдап, жеңілдетілген несиеге өтініштер қабылдауда.

         Жылдық үстемесі 1 пайызды құрайтын несие көлемі 100 мың теңгеден 5 млн теңгеге дейін. Екі түрлі жолмен беріледі – 2 млн теңгеге дейін кепілсіз және 2 млн-нан 5 млн-ға дейінгі кепілмен несие.
Кәсіпкерлердің қаражат алуларын барынша жеңілдету мақсатында ауданға ұйымның арнайы 7 маманы белгіленген секторларға бекітілген. Берілген өтініштердің қаралу мерзімі 7 жұмыс күні.

         Несие алуы үшін өтініш берушінің жеке куәлігі, салық органдарына қарызы жоқтығы жайлы анықтама мен өрттен материалдық зардап шеккен азаматтардың тізімінде болуы міндеттеледі.

          Айта кетейік, өрттен 600-ден астам саудагер зардап шегіп, мыңнан астам сауда нүктесі жапа шеккен болатын.

Бауыржан НАЙМАНОВ, 

Жетісай ауданы.