ЖАЗДЫҚ СУ МӘСЕЛЕСІ БАСТЫ НАЗАРДА

Негізінен біздің ауданымыз тұрғындарының негізгі табыс көзі егіншілікке байланысты болғандықтан, олар үшін егістіктер, бау-бақшалар, үй іргелік учаскелерді қыстық және жаздық ағынсумен қамтамасыз ету басты мәселе екені анық.

Бүгінде осы ағын су жайы, нақтырақ айтқанда жаздық су –»Алмалы», «Жайлаукөл», «Шолпанқұдық», «Темір жол» елдімекендерінің шаруалары үшін күрмеуі қиын нағыз түйткілді мәселеге айналып отырғаны белгілі болды.

Күзгі жиын-терімнің түсімділігі мен шаруалардың ерте көктемнен бергі маңдай терлерінің қаншалықты ақталуына себепкер осы өзекті мәселеге орай – «Мақталы» ауылдық округіне қарасты «Жайлаукөл» елді мекенінде арнайы кездесу жиыны болып өтті.

Бұл маңызды жиынға «Мақталы» ауылдық округінің әкімі М. Абдумажитов, осы округке қарасты «Нұр ағыс» ауылшаруашылық өндірістік кооперативінің басшысы А.Сапарбай, «К-34» каналының гидроқызметкері Азамат Кожабаев, «Алмалы» елді мекенінің биі Т.Сартаев, осы елді мекен атынан Б.Джунисбеков, С.Бердімұратовтар мен аудандық мәслихат депуттары да қатысып, ағын су мәселесін оңтайлы шешу жайын талқылады.

Жиынның қорытындысы бойынша таңертеңнен бастап секундына 8 текше метр су ашылып, шаруаларды толғантқан өзекті мәселе оң шешімін тапты.

Алдағы уақыттарда да осындай өзекті мәселелер дер уақытында шешіліп отырса, ауыл диқандарының жиын-терім кезінде қамбалары толып, әлеуметтік жағдайлары жақсарары анық.

Ұлжан СӘБИТҚЫЗЫ,

Жетісай ауданы.