ЕЛІМІЗДІҢ БІЛІМ БЕРУ ОРДАЛАРЫНА ҮЛГІ БОЛАР ТЫҢ ЖОБА

       Біздің ауданымызда орын тепкен №34 Ә.Молдағұлова атындағы жалпы орта мектебінде 2021-2022 оқу жылында «Оқуға құштар мектеп» атты игі жоба жүзеге асырылған болатын. Осы жобаның аясында мектеп ұстаздары – оқушыларының кітап оқуға деген қызығушылықтарын арттырып, оларға көркем шығарманы талдауды үйренулерін мақсат еттті. Сонымен қатар, мектеп оқушыларының әдебиет саласындағы талғамдарын мықтап қалыптастыру мақсатында біршама жұмыстар атқарылған еді.

        Қарапайым тілмен айтсақ – «Оқуға құштар мектеп» жобасы арқылы білім ордасының ұстаздары жас буынның қимыл-әрекетін тежеуші, олардың өз құрбы-құрдастарынмен тікелей жанды түрде қарым-қатынас жасауына кедергі келтіруші интернет ойындары мен әлеуметтік желіге деген тәуелділіктерін бәсеңдетуді көздеген екен.

       Бұл жоба аясында мектепте  жүйелі түрде танымал балалар жазушысы Б.Соқпақбаевтың «Менің атым — Қожа» повесі, Т.Ахтановтың «Қаһарлы күндер» романы және Б.Момышұлының «Ұшқан ұя» повесінің желілері бойынша «Оқырмандар бәйгесі» өткізілсе, әр аптаның сәрсенбі күні «Сыныппен кітап оқу» күні болып бекітілген еді. Сонымен қатар, «Кітапханаға кітап сыйла» акциясы да өз деңгейінде ұйымдастырылып, әріптестер мен мектеп қонақтары мектептің кітапхана қорын молайтуға игі үлестерін қосты.

         Педагогтардың белсенді әрекеттерінің арқасында ол жоба мектеп оқушыларының арасында тез қолдау тауып, кітапханаға келуші оқырмандар саны біраз молайды. Бір қуантарлығы осындай шағын да болса, айтулы жетістікке жеткен мектептің әдісін аудандағы басқа да білім ордалары алдағы уақытта оны өз білім ордаларында қолданып көруді жоспарлауда екен. Егер ол жақтарда да бұл жоба зор табыстарға жетсе, онда алдағы уақытта аудан мұғалімдерінің тәсілі бүкіл республика мектептерінде қолданысқа енері анық.

          Ә.Молдағұлова атындағы жалпы орта мектебінің ұжымы болса, өз кезегінде алдағы оқу жылында да осы игі бастамаларын жалғастырып, оны одан әрі мазмұнды да қызықты, тағылымға толы етуді жоспарлап отырғандарын мәлімдеді.

Ұлжан СӘБИТҚЫЗЫ,

Жетісай ауданы.