САЙЫПҚЫРАН.KZ Ақпаратты-сараптамалық порталы АҚПАРАТ ӘЛЕМДІ БИЛЕЙДІ!
Ерте көктемнен қара күзге дейін егістікте еңбек ететін шаруалар үшін диханшылығына қажетті химикаттар мен минералды тыңайтқыштардың дер кезінде берілуі төккен тердің өтемі болмақ. Әйтсе де, жасыратыны жоқ, жер емген дихандардың көп жағдайда өзіне қажетті мөлшерде минералды тыңайтқыштар мен химикаттарды ала алмай жатады. Бұл өнімнің сапасы мен көлеміне теріс әсер етері анық.
Осындай мәселелерді оңды шешу мақсатында Жетісай ауданына қарасты Ж.Ералиев ауылдық округінде SINGENTA компаниясының «AGRO SERVIS» дүкені ашылды.
Агро-дүкеннің ашылуына округ әкімі Султан Касымов пен Жетісай аудандық ішкі саясат бөлімі басшысының міндетін уақытша атқарушы Бексултан Айдагараев, Түркістан облысы Қоғамдық Даму Басқармасының «Қоғамдық келісім» КММ Жетісай аудандық филиалының басшысы Құрманбек Рысмаханов пен аудандық ардагерлер кеңесінің төрағасы Айтбай Махамбетов, округтің шаруа қожалық төрағалары қатысты.
Аталмыш дүкен аудан аумағында іске қосылып отырған бесінші дүкен. Бұған дейін аудан орталығы Жетісай қаласында 2, Асықата кентінде 2 SINGENTA компаниясының агро-дүкендері жұмыс істеп келген.
«Округ шаруаларының сұранысы мен өтініштерін саралай келе Ж.Ералиев ауылдық округінен агро-дүкен ашуды ұйғардық. Биылғы жылдың соңына дейін Ш.Ділдәбеков ауылдық округінен де осындай дүкен ашуды жоспарлап отырмыз. Қазіргі таңда дүкеннің құрылыс жұмыстары жүріп жатыр» дейді жас кәсіпкер Асылбек Тастанбек.
Игі бастаманы қолға алып отырған жас кәсіпкер дүкенде жергілікті 3 азаматты тұрақты жұмыспен қамтып отыр. Мұнда бақша, көкөніс, мақта дақылдарына қажетті жоғары сапалы химиялық препараттар мен минералды тыңайтқыштар, мол өнім беретін голландиялық түрлі тұқымдар қолжетімді бағада сатылуда.
1997 жылы «Мақсат С» шаруа қожалығын ашып, диханшылықпен айналысып келе жатқан Серік Төребаев иелігіндегі 15 гектар егістікке қажетті химикаттар мен тыңайтқыштарды бұған дейін Жетісай қаласынан, Асықата кентінен тасымалдап келген. «Агро-дүкеннің ауылдан ашылуы шаруаның шығынын азайтып, сапасын қадағалауға да мүмкіндік береді» дейді.
SINGENTA компаниясының Түркістан және Қызылорда облыстарындағы өкілі Нұржау Әбдіғаппаровтың айтуынша шаруалар пицицидтер мен гербицидтерге, мақта мен бақша дақылдарының арам шөптеріне, мақта көсек құртына, өрмекші кенесіне қарсы ауыл шаруашылығы министрлігі бекіткен тәртіпке сәйкес дүкеннен берілген есеп-қисап құжаттары арқылы субсидия ала алады.
