МАҚТААРАЛДА «МЫРЗАКЕНТ» МОНШАСЫ ПАЙДАЛАНУҒА БЕРІЛДІ

Бүгін Мырзакент кентінде «Назар» шаруа қожалығының төрайымы, кәсіпкер Ұлболсын Асқарованың жеке қаражаты есебінен салынған «Мырзакент» моншасы ел игілігі үшін пайдалануға берілді. Қоғамдық кешеннің ашылу рәсіміне қатысқан ауданның кәсіпкерлік бөлімінің басшысы Өсер Мырзамдамов әлемдегі қиын жағдайға қарамастан ауданда шағын және орта бизнес дамып келе жатқанын айтты.

«Жаһандық пандемияға қарамастан, Мақтаарал ауданында кәсіпкерлік нысандарының қатары күн сайын артуда. Міне, бүгін заманауи үлгіде салынған қоғамдық монша тұрғындарымыз үшін қызмет көрсетуді бастады. Бұл — ауданда шағын және орта бизнестің дамуының бір көрінісі» — деді Ө.Мырзамдамов.

16 соток жердің аумағында орналасқан жаңа моншаның аумағы 1245 шаршы метрді құрайды. Нысанда 8 кешенді кабина және ерлерге, әйелдерге жеке-жеке қарастырылған жалпы кабиналар бар. Кабиналарда еуро-люкс стандарттарына сай келетін киім сақтайтын қойма, бассейн, жуынатын және кептірілетін бөлмелер бар. Моншаның іші кең, таза әрі ыңғайлы.

Мырзакент моншасы бір уақытта 120 адамды қабылдай алады. Кешенде қоғамдық тамақтану орны орналасқан және мұнда түрлі елдің асханаларынан дәм татуға жағдайлар қарастырылған. Тұтынушыларға сапалы қызмет көрсету үшін 15 адам жұмысқа қабылданыпты. Тұрғындар үшін қызмет көрсету бағасы да қолжетімді болмақ.

Айта кетейік, жаңадан ашылған «Мырзакент» моншасында карантин режиміне байланысты санитарлық талаптар қатаң түрде сақталатын болады. 

Мақтаарал ауданы әкімдігінің баспасөз қызметі.