«Тәуелсіздік лентасының» тұсаукесеріне қатысыңыздар!

12 желтоқсан күні Қарағанды қаласының Н.Гоголь атындағы кітапханада – Қазақстан Республикасының Тәуелсіздік күніне орай «Тәуелсіздік лентасының» тұсаукесері өтетін болады.
«Тәуелсіздік лентасы» «Қазақ халқының мұрасы – Мәңгілік ел кітаптар сериясы» қоғамдық жобасы аясында қолға алынған ұлттық құндылықтарды насихаттауға бағытталған 21-ші жоба болып табылады. Бұл лентаны шығарудағы мақсат – жастардың бойында ұлт тарихына деген қызығушылықты ояту мен құрметті қалыптастыру, тарихи жадыны жаңғырту болып табылады. «Тәуелсіздік лентасында» қазақ тарихының айшықты тұлғалалары мемлекет және қоғам қайраткерлері Мөде қаған, Керей мен Жәнібек, үш жүздің басын қосқан Абылай хан, ұлтымыздың Тәуелсіздігі үшін күресіп өткен Кенесары хан мен Алаш көсемі Әлихан Бөкейхан бейнеленген. Сонымен қатар, Қазақстан Республикасының картасы мен осы аумақта мекен еткен сақтардың Есік қорғанынан табылған Алтын адамы және Түркі қағанатының Бөрілі байрағы бейнеленген.
Қосымша ақпарат: 
Осыған дейін кітаптар сериясы аясында Ұлттық құндылықтар негізінде жастар бойында патриотизмді қалыптастыру, Менің елім! (Қазақстанның 14 облысы туралы мәліметтер), Тілім менің! (Қазақ тілінің даму тарихы мен тіл туралы ойлар, пікірлер), Тәуелсіз Қазақстанның тарихы (біздің дәуірімізге дейінгі 1 мыңжылдықтан бастап 2011 жылға дейінгі тарихы), «Тәуелсіз Қазақ елінің 526 жылдық тарихы» атты аудиокітап, Ұрпақ тәрбиесі, Ұлт ұлылары (Қазақтың белгілі тарихи тұлғалары туралы деректер), Қазақтың салт-дәстүрлері, Қазақтың қолөнері, Қазақтың ұлттық тағамдары (Қазақтың ас мәзірлері), Құсбегілік, атбегілік, төрт түлік, Қазақтың ұлттық ойындары, Халық әндері, Халық күйлері, Қазақ ертегілері (аудиокітап) барлығы 15 кітап жарық көріп, Қазақ халық күйлері фестивалі (2016 жыл), Қазақтың ұлттық ойындары жобасы (2008 жыл), Қазақ елі диктанттар жинағы (2009 жыл), Ұлы Қазақ елінің тарихы деректі фильмі (2009-2010ж.ж.), Қазақтың ұлттық күнтізбесі, Ұлт қайраткерлерінің мұрасы жылсайынғы қалалық конференция жобалары ұйымдастырылды.