Әр дауыс – ел ертеңіне қосылған үлес

           23 тамыз – әрбір азаматтың өз таңдауын жасап, елдің болашағына бейжай қарамайтынын көрсететін маңызды күн. Сайлауға қатысу – жай ғана дауыс беру емес, ол өз тағдырыңа, туған өлкеңнің дамуына және мемлекетіміздің келешегіне деген жауапкершіліктің көрінісі.

       Еліміздің Конституциясында әрбір азаматқа мемлекеттік істерді басқаруға қатысу құқығы берілген. Сол құқықтың ең маңызды тетіктерінің бірі – сайлау. Демократиялық қоғамда халықтың пікірі мен таңдауы шешуші рөл атқарады. Сондықтан әрбір сайлаушының дауысы маңызды, әрбір таңдау елдің ертеңіне әсер етеді.

         Бүгінгі таңда елімізде жүргізіліп жатқан реформалардың басты мақсаты – әділетті, ашық әрі халық үніне құлақ асатын мемлекет қалыптастыру. Осы жолда азаматтардың қоғамдық-саяси белсенділігі ерекше маңызға ие. Сайлауға қатысу – өз ұстанымыңды білдірудің, қоғам өміріне араласудың және ортақ іске үлес қосудың нақты көрінісі.

        «Менің бір дауысым ештеңені өзгертпейді» деген түсінік – жаңсақ пікір. Керісінше, үлкен өзгерістер миллиондаған азаматтың жеке таңдауынан басталады. Әрбір берілген дауыс халықтың еркін білдіреді және қоғамның даму бағытын айқындауға ықпал етеді.

         Жастар үшін де бұл күннің маңызы ерекше. Өйткені ертеңгі Қазақстанды қалыптастыратын – бүгінгі жас буын. Ел тағдырына бейжай қарамайтын, азаматтық жауапкершілігі жоғары жастар ғана мемлекетіміздің тұрақты дамуына үлес қоса алады.

        Сайлау – заңмен кепілдендірілген құқық қана емес, азаматтық парыз. Сондықтан әрбір тұрғын 23 тамыз күні сайлау учаскесіне барып, өз таңдауын саналы түрде жасауы қажет. Бұл – туған елге деген құрметтің, қоғамдық жауапкершіліктің және болашаққа деген сенімнің айқын белгісі.

Сарыбай ӘЛІМЖАН,

Мақтаарал ауданы.