23 тамыз – азаматтық жауапкершілікті танытатын маңызды күн

       Әрбір елдің жарқын болашағы оның азаматтарының белсенділігіне байланысты. Ал азаматтық белсенділіктің ең маңызды көріністерінің бірі – сайлауға қатысу. Сондықтан 23 тамыз – әрбір сайлаушы өз таңдауын жасап, елдің ертеңіне бейжай қарамайтынын дәлелдейтін маңызды күн.

      Сайлау – демократиялық қоғамның басты құндылықтарының бірі. Ол халықтың еркін білдіруге, мемлекет өміріндегі маңызды шешімдерге өз үлесін қосуға мүмкіндік береді. Конституциямен кепілдік берілген бұл құқықты пайдалану – әр азаматтың абыройлы міндеті.

        Бүгінгі таңда елімізде жүзеге асырылып жатқан ауқымды реформалардың табысты болуы қоғамның белсенділігіне де байланысты. Елдің тұрақты дамуы, өңірлердің өркендеуі, халықтың әл-ауқатының артуы – бәрі де азаматтардың жауапкершілігі мен белсенді ұстанымына негізделеді. Сондықтан сайлауға қатысу – елдің дамуына қосылған нақты үлес.

      Әрбір дауыс – маңызды. Бір адамның таңдауы аз көрінгенімен, миллиондаған азаматтың ортақ таңдауы елдің келешегін айқындайды. Сондықтан дауыс беру – жай ғана рәсім емес, мемлекет тағдырына деген жанашырлықтың белгісі. Әсіресе жастардың саяси белсенділігі ерекше маңызға ие. Өйткені бүгінгі қабылданған шешімдер ертеңгі ұрпақтың өміріне ықпал етеді. Ел болашағына бейжай қарамайтын, азаматтық ұстанымы берік жастар ғана қоғамның дамуына серпін береді.

         23 тамызда әрбір сайлаушы өз таңдауын саналы түрде жасап, азаматтық ұстанымын танытады. Бұл – туған жердің дамуына, елдің тұрақтылығы мен бірлігіне қосылған үлес.

Едіге КҮНТУҒАН,

 Мақтаарал ауданы.