Өскеменде танымал айтыскер сарбаздармен бірге әскери ант қабылдады

          «Шығыс» өңірлік қолбасшылығына қарасты 6699 әскери бөлімінде әскери ант қабылдау рәсімі өтті. Отан алдындағы қасиетті борышын адал атқаруға серт берген салтанатты шараға сарбаздардың ата-аналары, ардагерлер, әскери бөлім басшылығы және «Шығыс» өңірлік қолбасшылығының қолбасшысы генерал-майор Арман Жұмағалиев қатысты. Қолбасшы ел қауіпсіздігін қамтамасыз ету үшін ант қабылдаған жауынгерлерге жүрекжарды жылы лебізін жолдады.

         Биылғы салтанатты шараның ерекшелігі – Отан алдындағы борышын өтеуге келген екі жүзге жуық жас сарбазмен бірге танымал айтыскер, республикалық және халықаралық айтыстардың жеңімпазы Жұлдызай Маратбекованың да әскери ант қабылдауы болды. Жұлдызай Маратбекова әскери бөлімде кадр және саптық бөлімшесінің аға маманы лауазымында қызмет атқарады.

         – Бала кезімнен әскери қызметші болуды армандадым. Кейін сөз өнеріне деген қызығушылығымның арқасында қазақ тілі мен әдебиеті пәнінің мұғалімі мамандығын меңгеріп, мектепте ұстаздық еттім. Дегенмен әскери қызметке деген құлшынысым мені бүгін Ұлттық ұлан қатарына алып келді. Енді ел қауіпсіздігі жолында адал қызмет етуге бар күш-жігерімді саламын, – деді қатардағы Жұлдызай Маратбекова.

        Салтанатты рәсім барысында айтыскер домбырамен арнайы арнау орындап, әскери ант қабылдаған жас сарбаздарға ақ жол тіледі. Ол өз жырында Отанға адал қызмет етудің маңызын дәріптеп, жастарды елжандылық пен патриоттық рухқа үндеді.

          Айта кетейік, Өскемен қаласындағы 6699 әскери бөлімінде әскери қызметін өтейтін жас сарбаздар – Абай, Алматы, Түркістан, Жамбыл және Солтүстік Қазақстан облыстарынан шақырылған.

«Шығыс» өңірлік қолбасшылығының баспасөз қызметі.