ЗАМАНАУИ ИНФРАҚҰРЫЛЫМ – МАЛ ШАРУАШЫЛЫҒЫН ДАМЫТУДЫҢ БЕРІК НЕГІЗІ

         Мақтаарал ауданында мал шаруашылығын дамытуға бағытталған игі бастамалар жүйелі жалғасуда. Биыл ауданның бірнеше ауылдық округінде бір мезгілде сегіз жаңа ветеринариялық пункттің құрылысы қолға алынып, ауыл тұрғындары үшін аса маңызды инфрақұрылымдық жоба жүзеге асырылуда. Бұл – төрт түлік саулығын қамтамасыз етіп қана қоймай, өңірдегі ветеринариялық қызмет сапасын жаңа деңгейге көтеретін маңызды қадам.

         Түркістан облыстық Ветеринария басқармасының бастамасымен жүзеге асырылып жатқан жоба аясында бүгінгі таңда Ж.Нұрлыбаев, А.Қалыбеков, Еңбекші, Достық, Жаңа жол, Бірлік және Мақтаарал ауылдық округтерінде ветеринариялық пункттердің құрылысы қарқынды жүргізілуде. Құрылыс жұмыстары белгіленген кестеге сәйкес атқарылып, нысандарды сапалы әрі уақытылы пайдалануға беру басты назарда.

        Бұл жобаның ерекшелігі – құрылыс жұмыстары «BATSU» компаниясының жеке қаражаты есебінен жүргізілуде. Алдағы уақытта дайын нысандар мемлекет теңгеріміне сатып алынатын болады. Бұл – мемлекеттік-жекеменшік әріптестіктің тиімді тетіктерінің бірі ретінде ауылдық жерлердегі әлеуметтік және өндірістік инфрақұрылымды дамытуға бағытталған нақты қадам.

       Жаңа ветеринариялық пункттер заманауи талаптарға сай жобаланған. Ғимараттарда ветеринариялық мамандардың жұмыс кабинеттері, дәрілік заттарды сақтауға арналған арнайы қоймалар, пункт меңгерушісінің жеке кабинеті, санитарлық торап, жуынатын бөлме және қызметкерлердің тынығуына арналған арнайы бөлме қарастырылған. Мұның барлығы мамандардың сапалы қызмет көрсетуіне қолайлы жағдай жасайды.

      Сонымен қатар, пункттердің сыртқы аумағы да толықтай ветеринариялық жұмыстарды жүргізуге бейімделеді. Мұнда малды ветеринариялық өңдеуге арналған арнайы бассейндер, сырғалау, вакцинациялау және тіркеу жұмыстарын қауіпсіз жүргізуге мүмкіндік беретін бекіту құрылғылары орнатылады. Бұл жабдықтар ветеринариялық іс-шаралардың тиімділігін арттырып, жануарлар мен мамандардың қауіпсіздігін қамтамасыз етуге мүмкіндік береді.

       Мал шаруашылығы – Мақтаарал ауданы халқының негізгі табыс көздерінің бірі. Сондықтан ветеринариялық қызметтің сапасы мен қолжетімділігі ауыл тұрғындары үшін ерекше маңызға ие. Бұған дейін кейбір елді мекендерде мұндай инфрақұрылымның жеткіліксіздігі белгілі бір қиындықтар туғызған болса, жаңа ветеринариялық пункттердің пайдалануға берілуі бұл мәселені кезең-кезеңімен шешуге жол ашады.

       Мамандардың айтуынша, сапалы ветеринариялық қызметтің қолжетімді болуы жануарлар арасында жұқпалы аурулардың алдын алуға, профилактикалық іс-шараларды уақытылы жүргізуге, мал өнімдерінің қауіпсіздігін қамтамасыз етуге және өңірдегі эпизоотиялық ахуалды тұрақты сақтауға оң әсер етеді. Бұл өз кезегінде мал басының сақталуына, өнім көлемінің артуына және ауыл шаруашылығы өндірісінің тиімділігін көтеруге ықпал етпек.