ЖАҢА ҚҰРЫЛЫС НЫСАНДАРЫ ЕЛ ИГІЛІГІНЕ ҚЫЗМЕТ ЕТЕДІ

            Мақтаарал ауданында халықтың тұрмыс сапасын жақсартуға бағытталған жобалар жүйелі жүзеге асырылуда. Осы мақсатта аудан әкімі Бақыт Асанов,  Жаңажол ауылдық округіне қарасты Фирдауси ауылына арнайы барып, жаңадан пайдалануға берілген әкімшілік ғимараты мен тұрғын үй құрылысының барысымен танысты.

         Сапар барысында аудан басшысы алдымен заманауи талаптарға сай салынған жаңа әкімшілік ғимаратын аралады. Қазіргі таңда Жаңажол ауылдық округі әкімінің аппараты жаңа ғимаратқа толықтай қоныстанып, тұрғындарға қызмет көрсетуді бастап кеткен.

         Қызметкерлермен кездескен аудан әкімі жаңа нысанның басты мақсаты – мемлекеттік қызметтің сапасын арттырып, тұрғындардың өтініштері мен мәселелерін жедел әрі тиімді шешуге жағдай жасау екенін атап өтті.

        Жалпы аумағы 24,78 сотық жерді алып жатқан әкімшілік ғимаратта тоғыз қызметтік кабинет, мәжіліс залы, кең қабылдау бөлмесі және санитарлық торап қарастырылған. Сонымен қатар нысан табиғи газ, электр қуаты және кәріз жүйесімен толық қамтамасыз етілген.

           Іссапар аясында аудан әкімі Фирдауси ауылында бой көтеріп жатқан жаңа тұрғын үйлердің құрылыс жұмыстарымен де танысты.

          Жоба аясында 100 пәтерді құрайтын 50 тұрғын үйдің құрылысы аяқталған. Қазіргі таңда жаңа шағынауданда абаттандыру жұмыстары жүргізіліп, жол құрылысы жалғасуда. Мамандар жол негізіне геосинтетикалық материалдар төсеп, асфальт жабындысын белгіленген мерзімде аяқтауды жоспарлап отыр.

         Әр тұрғын үй 7 сотық жер теліміне орналасқан. Жалпы ауданы 63 шаршы метрді құрайтын баспаналарда үш тұрғын бөлме, ас үй, кіреберіс және санитарлық торап қарастырылған. Жаңа тұрғын алабы ауыз су, табиғи газ, электр желісі және автомобиль жолдарымен толық қамтылған.

       Аудан басшысы құрылыс сапасына, инженерлік инфрақұрылымның толық жүргізілуіне және абаттандыру жұмыстарының уақытылы аяқталуына ерекше назар аударып, жауапты сала басшылары мен мердігер ұйымдарға барлық жұмысты сапалы әрі белгіленген мерзімде аяқтауды тапсырды.

        Айта кетейік, жаңа тұрғын үйлер тұрғын үй кезегінде тұрған азаматтарға ипотекалық және жалдамалы тұрғын үй ретінде ұсынылады. Бұл жоба ондаған отбасының баспана мәселесін шешумен қатар, Фирдауси ауылының әлеуметтік инфрақұрылымын нығайтып, халықтың өмір сүру сапасын арттыруға елеулі үлес қоспақ.