СЕМЕЙДЕГІ «САҢЫРАУЛАР ҚОҒАМЫНДАҒЫ» «БАСТАУЫШ ПАРТИЯ ҰЙЫМЫНЫҢ» МҮШЕЛЕРІ ЖИДЕБАЙҒА САПАРЛАП БАРДЫ

       2025 жылдың 16 тамызында «Ауыл» партиясы Абай облысы бойынша өңірлік филиалының қолдау және ұйымдастыруымен ерекше мазмұнды мәдени-әлеуметтік сапар өтті. Семей қаласындағы Қоғамдық бірлестік санатындағы «Саңыраулар қоғамы» «Ауыл» партиясы жанынан ашылған «Бастауыш партия ұйымының» мүшелері тарихи мекен – Жидебайға сапар шекті.

       Сапардың басты мақсаты – ерекше қабілетті жандардың рухани өміріне серпін беру, мәдени-танымдық бағыттағы іс-шаралар арқылы қоғамдағы өз орнын толыққанды қалыптастыруға атсалысу.

       Рухани сапарға қатысушылар, ең алдымен, қасиетті Күшікбай ата басынан бастап, жолай Бөрілі мүражайын аралап, одан кейін Еңлік — Кебек басына соғып, жер кіндігі Жидебайдағы қазақтың дана ақын ұлы Абай Құнанбайұлының мұражай-үйіне экскурсия жасап, хакімнің өмір жолы мен мұрасына қатысты мол мағлұмат алды. Жидебайдың қоңыр самалы мен жусаны жұпар аңқыған кең дала тынысы, ақынның көзіндей болған жәдігерлер ерекше қабілетті қонақтардың көңілін толқытып, жүректеріне рухани жылылық ұялатты.

        Ондағы мазмұнды да ерекше бір әсерлі мезет – Хакім Абайдың «180 жылдық мерейтойы» негізінде, қарасөздері мен өлеңдерін «ым тілімен» оқу шарасы өткізілді. Қол қимылы мен мимика арқылы ұсынылған поэзия жолдары «ғибраттылыққа шақырудың» да өз тілі бар екенін дәлелдеді. Бұл көрініс тыңдаушылардың көкірегіне жарық бір ой сәулесін қондырып, жүректеріне тікелей жол тапты.

         Шара барысында, әлеуметтік гранттар мен мүмкіндігі шектеулі жандарға арналған қолдау бағдарламалары туралы түсіндіру жұмыстары жүргізілді. Партия өкілдері қоғамдағы осал топтарды қолдау – «Ауыл» партиясы қызметінің маңызды бағыттарының бірі екенін атап өтті. Сондай-ақ, бірнеше азамат партия қатарына қабылданып, төсбелгі табысталды.

Бұл тарихи тағылымды сапарды экскурсиялық қысқаша таныстырып, ұйымдастыру шарасында «Ауыл» партиясы Абай облысы бойына өңірлік филиалының өкілі Омарғалиев Ерік Қайратбекұлы атқарды. Ол өз сөзінде: «Біз үшін бұл сапар – тек мәдени іс-шара ғана емес, адамдардың жүрегін сүйіспеншілікпен жылытатын, рухани көпір орнататын мүмкіндік. Абай мұрасы – бәрімізге ортақ қазына, ал оны ерекше ілтипатпен қабылдау – ерек сезім,» – деді.

         Жидебайдағы бұл күн «жүрек тілінің» — өз үні, поэзияның да өз әсем- сазга өрнектелген ырғағы бар екенін айқын көрсеткендей. Іс-шараға қатысушылар киелі мекен Жидебайдан ерекше әсермен, жаңа серпінмен оралды.

«Ауыл» партиясы Абай облысы бойынша өңірлік филиал баспасөз қызметі.