СЫБАЙЛАС ЖЕМҚОРЛЫҚҚА ЖОЛ БЕРМЕУДІҢ ЕЛ ҮШІН МАҢЫЗЫ ЕРЕКШЕ

        Бүгінгі күні сыбайлас жемқорлықпен күрес – мемлекеттік саясаттың басым бағыттарының бірі. Жемқорлық – елдің дамуына кедергі келтіріп қана қоймай, қоғамның әділдікке, заң үстемдігіне деген сенімін әлсірететін қауіпті құбылыс. Сондықтан да оған қарсы тұру – тек құқық қорғау органдарының ғана емес, барша қоғамның міндеті.

         Президентіміз Қасым-Жомарт Тоқаев сыбайлас жемқорлықтың мемлекет үшін қаншалықты қауіпті екенін, сол себепті де оған қарсы күресті барынша күшейтуді үнемі атап өтіп келеді. Қазіргі таңда мемлекеттік қызмет саласында ашықтықты қамтамасыз ету, электрондық үкімет жүйесін дамыту, мемлекеттік сатып алуларды цифрландыру – жемқорлықтың алдын алудың тиімді тетігі болып отыр.

        Жемқорлықпен күресте халықтың белсенділігі ерекше рөл атқарады. Әр азамат құқық бұзушылықтың кез келген көрінісіне бей-жай қарамай, оны тиісті органдарға хабарлау арқылы әділдікке үлес қоса алады. Ашықтық, жариялылық, азаматтық белсенділік – жемқорлыққа қарсы иммунитет қалыптастыратын негізгі қағидаттар.

        Осындай қоғамдық кеселге қарсы күрестің маңызды бағыты – жастарға адалдық, әділдік және жауапкершілік құндылықтарын дәріптеу болып табылады. Сол бағытта мектептер мен жоғары оқу орындарында «Адалдық сағаттары», пікірталас алаңдары мен арнайы жобалардың ұйымдастырылуы өскелең ұрпақты парасаттылыққа баулиды.

        Қорыта айтар болсақ, сыбайлас жемқорлыққа қарсы күресте ең бастысы – әрбір азаматтың ұстанымы. Адал еңбек етіп, әділдік пен заңдылықты жоғары қойған қоғамда ғана өркениетті ел болашағы нық қалыптасады. Сол себептен де сыбайлас жемқорлыққа жол бермеу – баршамыздың ортақ парызымыз болуы керек.

Нұрлыбек МУТАЕВ,

Қазыбек би ауылдық округі әкімі, Жетісай ауданы.