Жетісайда Дінмұхамед Қонаевтың өнегелі өміріне арналған семинар-кездесу өтті

         Жетісай қаласындағы Дінмұхамед Қонаев атындағы №9 IT мектеп-лицейінде «Дінмұхамед Қонаев: Елдің өркендеуіне арналған өнегелі өмір» тақырыбында семинар-кездесу болып өтті.  Бұл шара қазақ халқының көрнекті мемлекет қайраткері Дінмұхамед Ахметұлы Қонаевтың өмірі мен қызметін насихаттауға арналды.

          Аталмыш семинарға аймақтық деңгейдегі беделді тұлғалар қатысты. Қонақтар қатарында Жетісай ауданы әкімінің орынбасары Серік Прімбеков, Қонаев қорының басшысы Айыпберген Балтабаев, Жетісай қаласы әкімдігінің жалпы бөлім басшысы Қарлығаш Альжановна, Ернұр пресс ЖШС-нің басшысы Асылхан Алиев, сондай-ақ аудан мектептерінің тәрбие ісі жөніндегі орынбасарлары болды.

          Іс-шара барысында қатысушылар Дінмұхамед Қонаевтың өмір жолы, еңбекқорлығы, халық игілігі үшін жасаған ерен еңбегі туралы тың деректермен бөлісті. Қонаев қорының басшысы Айыпберген Балтабаев атақты тұлғаның мемлекет дамуына қосқан үлесін атап өтіп, оның жеке қасиеттері мен даналығы жөнінде маңызды мәліметтерді жеткізді.

         Сонымен қатар, семинар барысында қатысушылар аймақтық тәрбие жұмыстарының сапасын арттыру, өскелең ұрпаққа ел тарихын тереңірек таныстыру мәселелерін талқылады. Бұл кездесудің басты мақсаты – Дінмұхамед Қонаевтың үлгілі өмір жолын жастарға өнеге етіп көрсету және ұлттық құндылықтарды дәріптеу. Келешек ұрпақты табиғатты аялауға баулу мақсатында мектепте «Дінмұхамед Ахметұлы Қонаев атындағы саябақ» ашылып, қонақтар ағаштар отырғызды.

         Семинар қонақтары мен қатысушылар Дінмұхамед Қонаевтың еңбектері қазіргі заманғы жас буын үшін үлкен маңызға ие екенін айтып, осындай шаралардың тәрбие жұмысына оң ықпалын тигізетінін атап өтті.

         Шара соңында қатысушылар бірлескен қорытынды ұсынымдар қабылдап, естелік суретке түсті.

 Исаева Жумакуль Шириновна,

 «Дінмұхамед Қонаев атындағы №9 ІТ мектеп-лицейі» директорының тәрбие ісі жөніндегі орынбасары.

Жетісай ауданы.