СЫБАЙЛАС ЖЕМҚОРЛЫҚ ЖОЙЫЛМАЙ, ЕЛДІҢ ДАМУЫ МҮМКІН ЕМЕС
Posted by: Қалмұрат
in Қоғам, Қылмыс пен жаза, Өзекті мәселе
07/01/2023
32 Views
Қазіргі таңда сыбайлас жемқорлықпен күрес мәселелері кез келген мемлекет үшін өзекті проблемалардың бірі. Барлық елдерде оның трансұлттық сипаты танылып, оған қарсы экономикалық, құқықтық және басқа да шаралар қолданылуда. Тәуелсіздік алған мезеттен бастап бізде де, бұл аса ауыр қылмысқа қатысты қатаң мемлекеттік саясат қалыптасты. Еліміз ТМД мемлекеттерінің арасында бірінші болып 1998 жылы «Сыбайлас жемқорлыққа қарсы күрес туралы» арнайы заңды қабылдады. Кейіннен бұл саладағы ұлттық заңнаманы жетілдіру барысында Қазақстан Біріккен Ұлттар Ұйымының Сыбайлас жемқорлыққа қарсы, Трансұлттық ұйымдасқан қылмысқа қарсы конвенцияларын және басқа да жалпы жұрт таныған халықаралық актілерді ратификациялап, сыбайлас жемқорлыққа қарсы бүкіләлемдік қоғамдастықтың тең мүшесіне айналды.
Сыбайлас жемқорлыққа қарсы бүкіләлемдік кеңістіктегі Қазақстанның көрсеткіштері жыл сайын жақсарып келеді. Бұл проблемамен жан-жақты айналысып жүрген беделді халықаралық ұйым – Transparency International қорының деректеріне сүйенсек, сыбайлас жемқорлықты қабылдау индексі бойынша Қазақстан 2022 жылғы 25 қаңтарда жарияланған мәлімет бойынша 180 орынның 102-ші орнына жайғасқан. Бұл индекс кәсіпкерлердің, сарапшылар мен зерттеу ұйымдарының мәліметтерін қорытындылай отырып, жыл сайын шығарылып отырады.
Сыбайлас жемқорлық әлеуметтік-экономикалық даму үдерісін, нарықтық экономиканың құрылуын, инвестициялар тарту процесін тежейді. Демократиялық мемлекеттің саяси және қоғамдық институттарына кері әсерін тигізеді, елдің болашақ дамуына елеулі қауіп төндіреді. Қазақстанның мемлекеттік саясатының негізгі басымдықтарының бірі сыбайлас жемқорлықпен күрес болып табылады.
Президентіміз Қасым-Жомарт Тоқаев бір сөзінде «Сыбайлас жемқорлық – өте күрделі құбылыс. Былай айтқанда дерт деп те айтуға болады.Батпандап кіретін, мысқылдап шығатын кесел. Сондықтан бұл дертпен міндетті түрде бәріміз қоғам болып күресіміз керек. Әйтпесе, кеш болып қалуы мүмкін. Сыбайлас жемқорлықтың кесірінен алып мемлекеттер, ірі мемлекеттер құлағанын бәріміз білеміз, куә болдық» деп, сыбайлас жемқорлыққа қоғам болып күресуге шақырды.
Жемқорлық әрекеттерін анықтау және болдырмау жергілікті мәселелерді зерттеудің арқасында артады. Сыбайлас жемқорлық деп аталатын дертті емдеу үшін қоғамның барлық жігінің жүйелі түрдегі күш-жігері қажет! Біргелікті жұмылып, қоғам болып кіріссек сыбайлас-жемқорлық жойылып, еліміз одан сайын көркейіп, өркендейді деп сенемін!
О.ПЕРДЕ,
Мақтаарал ауданының статистика басқармасының
жетекші маманы.
Қоғамның қатерлі дерті СЫбайлас жемқорлыққа жол жоқ 2023-01-07