АЛҒАШҚЫ ӨНІМ БЕРГЕН ҚЫРЫҚҚАБАТ ДАҚЫЛЫ РЕСЕЙГЕ ЭКСПОРТТАЛДЫ

         Мақтаарал ауданында алғашқы өнім берген қырыққабат дақылы Ресейге экспортталды. Достық ауылдық округі, Гүлістан елдімекенінде орналасқан «Сауран» шаруа қожалығы 3 гектар жерден жиналған 75 тонна өнімді жүк көліктеріне тиеп, жолға аттандырды.  

         2022 жылы аудан бойынша 368 гектар жерге қырыққабат дақылы егілген. Қаңтар және ақпан айларында егін еккен диқандар бүгінде жерден өнім ала бастады.

        «Сауран» шаруа қожалығының иесі Сауран Тұраевтың 30 гектар жері бар. Соның 3 гектарына қырыққабаттың «пекинка» атты сортын еккен екен. 50 күннің ішінде пісіп жетілген өнімнің келісін қожалық қазіргі таңда 230 теңгеден Ресейге жөнелтуде.

        Жаңа технологияларды пайдалана отырып тамшылатып суару әдісімен қырыққабат еккен С.Тұраев өнімнің бағасы көңілді көншітетінін, еткен еңбекті және шыққан шығынды ақтай отырып мол пайда тауып жатқанын айтты. Қырыққабатты жинап, қораптарға салу үшін 20-дан астам жалдамалы жұмысшыларды жалдап, күнделікті еңбекақыларын беріп жатқанын да қожалық басшысы атап өтті.

          Аудандық ауыл шаруашылығы бөлімінің басшысы Баязит Әлімқұл қырыққабаттан өнімін жинап болған шаруа қожалықтары артынша мақта, бақша және мал азықтық дақылдар егіп, бір жерден 2-3 өнім алатындарын жеткізді. Облыс әкімі Ө.Шөкеевтің тапсырмасына сәйкес, бір жерден 2-3 өнім алу технологиясын ендіру бағытында шаруаларға түсіндіру жұмыстарын жасау мақсатында тұрақты түрде семинарлар мен жиындар өткізіп жатқандарын бөлім басшысы атап өтті.

         Айта кетейік, Мақтаарал ауданында 2021 жылы 415,5 гектар жерге қырыққабат дақылы егіліп, 20 мың тоннаға жуық өнім жиналған болатын. Өнімнің орташа түсімі гектарына 472 центнерді құраған еді.

Мақтаарал ауданы әкімдігінің баспасөз қызметі.