АУЫЛДАСТАР ӨЗ БАСТАМАЛАРЫМЕН СЕНБІЛІК ЖАСАДЫ

           Еліміздің өзге өңірлеріне қарағанда көктемі ерте келетін Жетісай жерінің тұрғындары да басқа жақтағыларға қарағанда ерте қамданады. Яғни көктемгі егістікті ерте бастап, тазалық жұмыстарын да ерте бастайды.

         «Туған жердің топырағы – бәрімізге қымбат» деп ұрандатқан Жетісай ауданы, Ж.Ералиев ауылдық округіне қарасты Үтіртөбе елді мекенінің тұрғындары ауыл ақсақалдарының бастамасымен ауылдарына жаппай тазалық жұмыстарын жүргізді.

         Туған елге, ауылға қарайласып, ерте көктемде сенбілік ұйымдастырып, туған өлкенің көркеюіне мұрындық болып отырған азаматтардың тірлігі қашан да құптарлық бастама.

          «Амандық болса, алдағы төрт-бес жылда бұл маң адам танымастай болып өзгеретініне сенімдіміз. Бастысы бауырлар-дың, ағайындардың ынтасы зор. Бір қуанарлығы – бұл іске жастармен қатар ауылдың үлкендері де тартылып отыр» дейді ауыл ақсақалдары.

           Сенбілік барысында ауыл ішіндегі арық көздері тазаланып, көшелер де ретке келтіріліп отыр. Ауыл азаматтарының арасында осындай іске қолдау көрсетіп, басы-қасында арнайы техникалармен көмек көрсеткендер де болды.

          Ерте көктемде ауылдағы ағайын жазғы және күзгі тірлігіне ерте қамданып жатады. Алайда, кейде қолда барды ұқсата алмай, қала берді техника жетпей, бір істің қиуы кетіп жататыны тағы анық. Ал, мұндайда үтіртөбелік жігіттердің ісіне тіпті риза болып, «Әй, бәрекелді!» деуден басқа айтар сөз жоқ.

Б.НАЙМАНОВ.