ЖҮРЕКТЕРГЕ СЕНІМ ҰЯЛАТҚАН «СЕРПІН»

             Жетісай ауданының адами әлеуетті дамыту бөлімінің Н.Төреқұлов атындағы №13 жалпы орта мектебінде Шығыс Қазақстан облысының Өскемен қаласынан келген делегация мүшелері жетісайлық оқушылармен, олардың ата-аналарымен, ұстаздармен жүздесті.

               С.Аманжолов Университетінің білім беру бағдарламаларына оңтүстік мектептерінің түлектерін тарту, кәсіптік бағдар беру жұмысын жүргізу мақсатындағы «С.Аманжолов университеті күндері» атты жиында жоғары сынып оқушыларына «Мәңгілік ел жастары – индустрияға», «Серпін» бағдарламасы аясында Өскемен қаласындағы «Сәрсен Аманжолов» мемлекеттік университетінде оқып, білім алуға шақырды.

                Кездесу барысында еліміздегі көп сұранысқа ие оқу орындарының алғашқы ондығында алтыншы орында тұратын оқу орны студенттерінің бүгінде онға тарта Еуропа мен Азия елдерінде білім алу мүмкіндіктері бар екенін, оңтүстік өңірлерден барған барлық студенттердің жатақханамен қамтылатынын айтқан университеттің қабылдау комиссиясының төрайымы Ләйла Байжұманова жастарға жасалатын жағдайлар мен жеңілдіктер, оқытылатын мамандықтар бойынша толық мағлұмат беріп өтті.

               Бүгінде 70-тен астам мамандық бойынша білім беріп, оның 50-ден астам мамандықтары бойынша бакалавриат дәрістерін жүргізетін оқу орны басшылығының тікелей араласуымен университет түлектері арасында тұрақты жұмысқа орналасушылардың саны жыл санап артып, аспирантура мен доктарантурада оқып білімдерін жетілдіріп жатқандардың да қарасы қалыңдап келеді.

              Биыл құрылғанына 68 жыл толған Шығыстың қарашаңырақ білім ордаларының бірі саналатын «Сәрсен Аманжолов» университетінің өнерпаздары жастарға концерттік бағдарламаларын ұсынып, Жетісай ауданынан барған студенттердің ата-аналары мен ауданның адами әлеуетті дамыту бөлімінің басшысы Тұрсын Мырзалиевке, бірқатар мектеп директорларына университет ректорының алғыс хаттарын табыс етті. Құрмет көрсетті.

              Айта кетейік, 2014 жылы еліміздің еңбек ресурстары басым келетін оңтүстік өңірлерінің жастарын – кадр тапшылығын көріп отырған аймақтарда оқытып, жұмысқа орналастыру идеясымен бастау алған бірегей бағдарлама, мыңдаған жастардың Батыс пен Шығыс, Солтүстік Қазақстанда білім алуына кең жол  ашты. Кәсіптік-техникалық колледждер мен жоғарғы оқу орындарында сапалы білім алып жүрген жастар – аталмыш бағдарламаның жемісі.

Бауыржан НАЙМАНОВ,

Жетісай ауданы.