АУДАН БАСШЫСЫ «СЫРДАРИЯ» УНИВЕРСИТЕТІНІҢ ЖҰМЫСЫНА ЖОҒАРЫ БАҒАСЫН БЕРДІ

            Мемлекет басшысы Қасым-Жомарт Тоқаевтың биылғы жылғы «Халық бірлігі және жүйелі реформалар – Ел өркендеуінің берік негізі» атты Қазақстан халқына Жолдауында айтылған білім беру мәселелеріне арналған тапсырмаларды жүзеге асыруға үлес қосу және мектептер мен колледждерді бітірушілердің болашақ мамандықтарын таңдауына кәсіптік бағыт – бағдар беру ісінде Жетісай қаласындағы «Сырдария» университетінде біршама жұмыстар атқарылған.

          Оқу орнында атқарылған жұмыстар мен студенттерге жасалған жағдайлардың барысымен бүгін Жетісай ауданының әкімі Мұрат Болатұлы арнайы барып танысты.

          Университет жанынан ашылған «KinoAlem» кинотеатрының жұмысымен, көрермендерге жасалған жағдайлармен танысудан бастаған аудан басшысы оқу орнының зертханаларын, сонан соң қашықтықтан оқыту, электронды кітапхана мен университет ішінен ашылған тарихи-этнографиялық мұражайда болды. Аралас оқу форматында жұмыс жүргізіп отырған оқу орнындағы студенттердің жағдайлары мен тыныс-тіршілігінен, бос уақыттарын тиімді ұйымдастыруларына жасалған жағдайлардан хабардар болды.

           Білім ордасы мамандарының мәліметінше университет зертханасында бұған дейін аудандағы 90-ға тарта елді мекеннің ауыз су сапасының құрамына бактериялогиялық зерттеу жүргізіліп, тиісті қорытындылар жасалған. 2022 жылы бұл жұмыстарды аудан әкімдігімен біргелікте жүргізуге ниетті.

            23 жылдық тарихы бар «Сырдария» университетінде бүгінде 6 мыңға тарта студент білім алады. Талайлардың қанатын қатайтып, ғылым әлеміне аттандырған іргелі білім ордасы алыс-жақын шетелдік ғалымдармен де тығыз байланыста. Университет ұстаздары да шет елдерде оқып, білімін жетілдіріп отырады. Әлемнің ең мықты деген оқу орындарынан келген шетелдік ғалымдар университет қабырғасында студенттерге дәріс берсе, «Сырдария» университетінің ұстаздары шетелдік оқу орындарына барып тәжірибе алмасып, білімдерін желтілдіріп келуде. Нақтырақ айтар болсақ, университет басшылығы Қырғызстан, Өзбекстан, Ресей, Тәжікстан, Испания, Португалия, Германия сынды елдердің және Кембридж университетінің оқытушы-ғалымдарымен тығыз байланыс орнатқан.

          «Біздің университетте жабдықталған электронды кітапхана республикадағы электронды кітапханалары бар жоғары оқу орындарының арасында кітап қорымен, студенттер мен оқытушыларға қажетті оқулықтармен қамтамасыз етілуі бойынша төртінші орында. Біздегі кітапхананың тағы бір ерекшелігі – қолжетімді. Алыс-жақын шетелдік іргелі оқу орындарымен тығыз байланыс орнатуымыздың нәтижесінде бізде білім алушы студенттердің 10 пайызын көршілес мемлекеттерден келген жастар құрайды. Бізде бітірген студенттер де шет мемлекеттердің астирантураларында, докторантураларында дисертацияларын қорғап келіп жатыр» дейді университет ректоры, философия ғылымдарының докторы Тоқмырзаев Бақыт Салманұлы. Сондай-ақ, аз қамтамасыз етілген және әлеуметтік қолдауды қажет ететін көпбалалы отбасылардан шыққан 58 студентке жеңілдіктер қарастырған «Сырдария» университетінде биылғы жылы 3 студент ректор грантының иегері атанған.

         Еліміздің қиыр оңтүстігінде орналасқан аталмыш университеттің бүгінгі таңда профессор-оқытушылар құрамының, оқу, ғылыми-зерттеу, тәрбие жұмыстарының сапасын жетілдіру, материалдық техникалық базаны нығайту және қазіргі заман талабына сай жоғары білімді мамандарды оқытудың тиімділігін арттыру бойынша жүргізіліп жатқан тыңғылықты әрі жемісті жұмыстарына жоғары бағасын берді.

Бауыржан НАЙМАНОВ,

Жетісай ауданы.