ШАРУАЛАРҒА ТИІМДІ БАҒДАРЛАМАЛАР ТАНЫСТЫРЫЛДЫ

     Республикамыздың басқа өңірлерімен салыстырғанда бірнеше ай ерте басталатын өзіндік ерекшелігі бар, ауданымызда 2021 жылға егілетін ауыл шаруашылығы дақылдарының болжамдық егіс көлемі 843,4 мың гектарды құраса, сол егістік алқаптарда 30 мыңға жуық ауылшаруашылық тауар өндірушелері еңбек етеді деп күтілуде.

      Жуырда «Ауыл шаруашылығын қажылай қолдау қоры» АҚ-ның басшысы Мұхит Жуасбай мырза бастаған жұмысшы тобы, «Мақтаарал» мәдениет үйінде диқан-шаруаларымен кездесіп, ауданымыздағы өсімдік шаруашылығын дамытуға арналған және 2021 жылғы несие бағдарламаларды таныстырып, шаруалардың сұрақтарына жан-жақты жауап берді.

      «Ауыл шаруашылығын қаржылай қолдау қоры» АҚ-ның шаруаларға ұсынып отырған несие бағдарламаларына тоқталсақ. Олар:

     Өсімдік шаруашылығын дамытуға арналған несиелік бағдарлама;

    Мал шаруашылығын дамытуға несие беру бағдарламасы;

      Ауылшаруашылық өнімдерін сақтауға және өңдеуге арналған несиелік бағдарлама;

      Кәсіпкерлік қызметті дамытуға несие беру бағдарламасы.

     Жиын барысында өсімдік шаруашылығын дамытуға арналған несиелік бағдарлама бойынша шаруалар өздерінің келіспейтін жағдайлары мен сұрақтарын қонақтардың алдында қойып, тұщымды жауаптарды алды.

      Бізде өз тарапымыздан Мақтаарал ауданының шаруаларына тиімсіз шарттарды қайта пысықтауды ұсынып, шаруалардың мәселесінің оң шешімін табуына көмектестік. Алдағы уақытта көктемгі егістік жұмыстары үшін әрбір кәсіпкердің есеп-шотына қаржысы аударылып, шаруалар сол қаржыны мақсатты жұмсағаны туралы дәлел құжаттарын тапсыратын болды. Әрине, қолма-қолсыз ақша айналымына көшу өте орынды, бірақ бұл жоба жан-жақты толықтырылып, қайта қаралу керек деп санаймыз. Ауданымызда мұндай қаржылық айналымға дайын емес көптеген түйткілді жайлар бар. Соларды ескере отырып, біз көктемгі дала егістігі жұмыстарына несие алу шарттарын қайта қарауды ұсындық.

      Бүгінгі таңда біздің облысымыздың оңтүстігінде орналасқан 5 ауданда табиғи-климаттық ерекшеліктерге байланысты (атап айтқанда Мақтарал, Жетісай, Сарыағаш, Келес, Шардара аудандары) көктемгі дала жұмыстары қарқын алуда. Қаңтар айының 25-нен бастап, ерте пісетін қырыққабат дақылы егіліп, наурыз айынан бастап сол дақылдан 200 мың тоннаға жуық өнім алу күтілуде Осылайша, біз жақта көктемгі дала жұмыстары ерте басталғанмен де, өкінішке орай қаржы институттары тарапынан шаруаларды несиелендіру жұмыстары, жылда тек наурыз, мамыр айларынан басталады. Яғни, шаруалар аса қажет қаржыны уақтылы ала алмағандықтан егіс жұмыстары үшін қаңтар-ақпан айларында жоғары пайыздармен (жылдық 20-50%) екінші деңгейдегі банктер мен микроқаржы ұйымдарынан тұтынушылық несиелер алуға мәжбүр болады.

     Алдағы уақытта, осы жүйелік проблемалар өз шешімін табуы үшін, өз тарапымыздан ұсыныстарымызды айттық. Алдағы уақытта осы мәселелердің өз шешімін табатынына сенімдіміз.

Нұргүл АБДРАЗАКОВА,

«Атамекен» кәсіпкерлік палатасының Мақтаарал аудандық филиалының директоры.