ТӨЛҚҰЖАТ ЖОҒАЛТСАҢ 18 ЖЫЛ ТҮРМЕГЕ ҚАМАЛАСЫҢ

Times Now News-тің хабарлауынша – Үндістанның Махараштра штатындағы Аурангабад қаласында тұратын Хасина Бегум есімді әйел,  Пәкістанда жоғалтқан төлқұжатына байланысты 18 жыл түрмеде отырған.

2003 жылы 65 жастағы Хасина Бегум күйеуінің туыстарына бару үшін Пәкістанның Лахор қаласына барады. Сол жерде ол төлқұжатын жоғалтқандықтан түрмеге жіберіледі. Әйел 18 жылын сонда өткізді. Осы уақыт ішінде ол өзінің  кінәсіздігін айтып, шағымданғанмен, босатылмаған.

Пәкістан билігі Хасина Бегумды тек  Аурангабад полициясынан әйелдің қалада үйі бар және сол жерде тіркелгендігі туралы хабарлама алғаннан кейін ғана босатқан. Полицияның хабарлауынша, ол Үндістанның Уттар-Прадеш штатындағы Сахаранпур қаласының тұратын Дильшад Ахмедпен шаңырақ құрған.

Әйел Пәкістан түрмесінен босатылып, Үндістан билігіне тапсырылғанда ол: «Мен көптеген сынақтарды бастан өткердім, енді еліме оралғаннан кейін өзімді тыныш сезінемін. Мен өзімді көкте жүргендей сезінемін. Мені Пәкістан түрмесінде күшпен ұстады», — деп мәлімдеме жасаған.