АТАУЛЫ ӘЛЕУМЕТТІК КӨМЕКТІ АЛУҒА КІМДЕРДІҢ ҚҰҚЫҒЫ БАР?

Атаулы әлеуметтік көмек отбасының барлық мүшелеріне жан басына шаққандағы ең төменгі күнкөріс деңгейі мен кедейлік шегінің айырмашылығы ретінде (ең төменгі күнкөріс деңгейі 23144 теңге кедейлік шегінің 70%) тоқсан сайын өтініш берген айдан бастап тағайындалады.

Жан басына шаққандағы орташа табысы кедейлік шегінен аспайтын Қазақстан Республикасы азаматтарының, қандастардың, босқындардың, шетелдіктердің және Қазақстан Республикасында тұрақты тұратын, азаматтығы жоқ адамдардың атаулы әлеуметтік көмек алуға құқығы бар.

Атаулы әлеуметтік көмек көрсетілуі үшін тұрғылықты жері бойынша – халықты жұмыспен қамту орталығына, ал ауылдық жерлерде кент, ауыл, ауылдық округ әкіміне белгіленген үлгідегі өтінішпен және сәйкестендіру үшін жеке басын куәландыратын құжатпен жүгінеді, сонымен қатар елімізде енгізілген карантиндік жағдайға байланысты азаматтардың сақтығы үшін АӘК-ге алғаш рет өтініш беретін азаматтар egov.kz. электрондық үкімет порталы арқылы «байланыссыз» тапсыруға мүмкіндік жасалған.

Атаулы әлеуметтік көмек мыналарға:

      1) табысы аз болып табылмайтын адамдарға (отбасыларға);

      2) еңбекке қабілетті мүшесі жұмыспен қамтуға жәрдемдесу шараларына қатысудан бас тартқан отбасыға – жұмыспен қамтуға жәрдемдесу шараларына қатысудан бас тартқан күннен бастап алты ай бойы;

      3) алушының кінәсі бойынша бұрын жасалған әлеуметтік келісімшарт бұзылған және (немесе) әлеуметтік келісімшартта көзделген міндеттемелер орындалмаған жағдайларда, адамға (отбасыға) – атаулы әлеуметтік көмекті тағайындауға өтініш жасаудың алдындағы алты ай бойы;

      4) атаулы әлеуметтік көмек тағайындау үшін көрінеу жалған мәліметтер және (немесе) анық емес құжаттар берген адамдарға (отбасыларға) – оларды ұсынған күннен бастап алты ай бойы;

      5) материалдық жағдайын зерттеп-қарау нәтижелері бойынша дайындалған учаскелік комиссияның қорытындысына сәйкес атаулы әлеуметтік көмек беруге мұқтаж емес адамдарға (отбасыларға) тағайындалмайды.

2020 жылдың 1 қаңтарынан бастап атаулы әлеуметтік көмек көрсетудің жаңа моделі енгізілген. Шаралар кешені 3 бағытты қамтиды: біріншісі – көп балалы аналарды жеке санатқа шығару және оларға кепілді жәрдемақы беру; екінші – аз қамтылған азаматтарды қолдау және оларды жұмысқа орналастыруға ынталандыру; үшіншісі — барлық атаулы әлеуметтік көмек алушыларға олардың балалары үшін заттай қолдауды қамтитын кепілді пакет ұсынылатын болды.

Гульнара ЕРНАЗАРОВА,

Мақтаарал ауданының Жұмыспен қамту

және әлеуметтік бағдарламалар бөлімінің

бас маманы.