ОЙЫН БИЗНЕСІ ТУРАЛЫ

Ойын бизнесі саласындағы қызметті мемлекеттік реттеу нысандарын және ойын бизнесі саласындағы қызметті жүзеге асыру тәртібі Қазақстан Республикасының 12.01.2017 жылғы №219 санды «Ойын бизнесі» туралы Заңымен айқындалады (реттеледі). Ойын бизнесі саласында қызметтің мынадай түрлері жүзеге асырылады:

      1) казино;

      2) ойын автоматтары залы;

      3) букмекер кеңсесі;

      4) тотализатор.

Жоғарыда аталған Заңның 11 бабы, 1 тармағы бойынша Казино мен ойын автоматтары залдары Алматы облысында Қапшағай су қоймасының жағалауында және Ақмола облысының Щучье ауданында жергілікті атқарушы органдар айқындайтын аумақтар шегінде ғана орналастырылуға жатады, Қазақстан Республикасының басқа аумақтарында орналастыруға тыйым салынады.

Ойын мекемелері, тотализатордың немесе букмекер кеңсесінің кассалары тұрғын емес үй-жайларда орналастырылуға тиіс. Оларды тұрғын үйлердің (тұрғын ғимараттардың) тұрғын емес үй-жайларында, өнеркәсіптік кәсіпорындар мен олардың кешендерінің ғимараттарында және басқа да өндірістік, коммуналдық объектілерде және қойма объектілерінде, ғибадат үйлерінде (құрылыстарында), мемлекеттік органдар мен мекемелердің, білім беру, денсаулық сақтау, мәдениет ұйымдарының, әуежайлардың, вокзалдардың ғимараттарында, қалалық және қала маңы қатынастарындағы қоғамдық көліктің барлық түрлерінің станциялары мен аялдамаларында орналастыруға тыйым салынады.

Көрінеу заңсыз ойын мекемесін ашу не ойын бизнесін ұйымдастыру үшін ғимаратты, үй-жайды немесе құрылысты беруге, сондай-ақ көрінеу заңсыз ойын бизнесін жүзеге асыру (ұйымдастыру) үшін ойын жабдығын, бәс тігуді ұйымдастыруға және өткізуге арналған жабдық беруге тыйым салынады. Ойын автоматтарын немесе олардың бөліктерін казинодағы және ойын автоматтары залдарындағы қабырғаларға, терезе мен есiктің ойықтарына монтаждауға тыйым салынады.

            Қазақстан Республикасы Қылмыстық кодексінің 307 бабына сәйкес, ойын мекемесін заңсыз ашу не ұстау немесе ойын бизнесі саласындағы қызметті заңсыз ұйымдастыру, сол сияқты заңсыз ойын бизнесін ашу үшін үй-жайлар беру не Қазақстан Республикасының ойын бизнес туралы заңнамасында белгіленген орындардан тыс құмар ойындарын ұйымдастыру және откізу не ойын бизнес саласындағы қызметті лицензиясыз жүзеге асырғаны үшін қылмыстық жауапкершілік қарастырылған. Сонымен қатар, заңсыз ойын бизнесі үшін үй-жайларды беру мүлкі тәркіленіп, екі мың айлық есептік көрсеткішке дейінгі мөлшерде айыппұл салуға не сол мөлшерде түзеу жұмыстарына не алты жүз сағатқа дейінгі мерзімге қоғамдық жұмыстарға тартуға немесе екі жылға дейінгі мерзімге бас бостандығын шектеуге не сол мерзімге бас бостандығынан айыруға жазаланатындығын хабарлаймыз.

Мақтаарал ауданы бойынша

Мемлекеттік кірістер басқармасы.